Briefwisseling. Deel 3: 1640-1644

2755. E. de Franchemont²⁾.

J'ay receu celle qu'il vous a pleu me faire l'honneur de m'escrire sur le subject de Madamoiselle Dorp, laquelle je voudrois pouvoir servir. Je le ferois de tres bon coeur. Ce fut moy qui parla a Monsieur du Buat, affin qu'il eust souvenance d'elle par l'affection qu'il luy portoit. Il me dit que s'estoit son intention. Et qu'il avoit les pierreries de feu Madame du Buat³⁾ qu'il luy lairroit par testament. Il a depuis changé d'advis, luy laissant les 4000 ℔ contenus audit testament. Vous scaurez, Monsieur, que je suis importune de payer les debtes deues par le defunct a des personnes qui m'ont reproche que j'avois leur argent en mon service. J'ai este contrainct de leur monstrer une obligation que Monsieur Dorlot m'a passee, et de son mouvement, par devant notaire, de la somme de 2000 ℔ que je pretendz delivrer a ces gens la. Et si j'en usois autrement, ilz me feroient actionner pour les payer, ce que je vous prie qui me serve d'excuse, vous protestant que je m'estime malheureux de ce que je ne puis satisfaire a l'unique chose que vous avez desire de moy, que j'ay tous les regretz du monde de ne la pouvoir effectuer. Vous supliant de croire que, si je vous pouvois rendre service en cecy et le puis en toute autre occasion, ce me sera une joye de vous pouvoir tesmoigner de quelle affection je m'y employeray ...... Ce dernier de Juin 1641.

2) Zie No. 2745.

3) Zij heette Esther de Flins.