Briefwisseling. Deel 3: 1640-1644

2821. D. de Wilhem³⁾. (K.A.)

Obeissant au commandement qu'il vous a pleu me faire par les vostres du 10 du passé, j'ay fait lecture desdites lettres a M. Streso, et les ay accompagnees de ce que j'ay estime pouvoir servir. Et les lettres et mon discours l'ont diversement esmeu. Il me promettoit de me donner son sermon par escrit avec quelque advertissement, protestant de injuriis S.N.L., et me faisoit connoistre, qu'il ne desiroit plus ardemment son bien propre que vostre contentement. Du depuis, comme il y a deux de ses collegues au synode, le troisiesme affere⁴⁾ comme depute ad correspondentiam qu'ils appellent, et le quatriesme ne se laissant imposer charge d'affaire quelconque, pour s'estre remarie de nagueres, tout le fais de ces eglises est tumbe sur le pauvre Streso. De sorte que je ne l'ay osé presser. En attendant l'execution de sa promesse, il s'en est alle a Utrecht, pour se divertir. D'ou estant de retour il m'est venu veoir, et m'a

3) Zie No. 2765.

4) = affairé

[p. 215]

communique ceste lettre cy jointe, me disant qu'il luy semble, qu'il vauldroit mieux que le sermon ne fust point insere parmy les autres, pour ne causer nouvelle brouillerie, et que ladite lettre servist de preface, en cas que je le trouvasse bon. Je luy ay dit que je l'envoyerois a l'armee, pour presentir vostre advis, et l'ay prie de vouloir surseoir l'impression d'icelle jusques a ce que j'aye vostre permission. J'ay mesme attendu jusques ici a vous respondre, pour scavoir fermement sa resolution devant qu'entreprendre de vous en dire des nouvelles; vous en verrez ses raisons par le menu. Or mon advis seroit que vous gardassiez l'escrit ci joint pour declaration de son sentiment et qu'il vous dediast le livre par une autre preface, sans faire mention de ceste matiere, puisque le sermon n'y sera pas insere. Continuez moy donc l'honneur de me faire scavoir au plustost vostre volonte, afin que je vous y serve comme je doy et desire en qualite de ..... De la Haye, ce 17 d'Aoust 1641.