Briefwisseling. Deel 4: 1644-1649

3689. Aan prinses Amalia van Oranje⁶⁾. (H.A.)*

Mons.^r de Knuijt, qui aura l'honneur de veoir vostre Alt.^e devant ceste lettre, luy aura rapporté comme dès hier au matin l'enemi a commencé à mettre le feu en son quartier, et s'est retiré d'icy aupres vers Gant. On remarque que n'ayant point sonné de diane, il aura remué dès la nuict mesme et faict passer devant son bagage. Apres midy comme tout fut parti, S.A. fit monter à cheval toute la cavallerie du quartier de M. de Brederode, et s'en alla recognoistre celny de l'armée enemie, qui estoit retrenché beaucoup mieux que nous n'en ayons encor veu de leur façon. De sorte qu'il paroissoit, que leur dessein n'estoit pas d'en desloger au premier jour. Nos soldats aussi en ont rapporté une quantité incroyable de bois et de planches, toutes pieces de maisons et utensiles du pauvre païsan, qu'on void bien que ces gens là, quoyqu'en leur propre païs, foulent aveq bien moins de pitié que les nostres. D'abord S.A. eut de la peine à croire ce deslogement, la cause nous en estant incognue. Mais sur le jour - comme encor aura tesmoigné M. de Knuijt - elle nous fut bien declarée par le rapport que vint faire le comte de Marcheville⁷⁾, de la part de M. le duq d'Orleans, du succes qu'a eu le mareschal de Gassion⁸⁾ sur la riviere de S.^t Omer à Watene, ayant passé ce canal sans resistence considerable, Piccolomini⁹⁾ aveq ce peu de forces qu'il a, s'estant laissé divertir par une feinte vers Mardijck. Les François, se trouvans l'appetit venu en mangeant, semblent resolus de maintenir et fortifier ce poste, qui est tres avantageux, et leur ouvre

6) Een paar zinnen van den brief zijn uitgegeven in de Archives, 2^e ser., IV, blz. 107.

7) Zie blz. 7 en 16.

8) Zie blz. 19.

9) Zie blz. 24.

[p. 40]

toute la Flandre sans plus d'obstacle. Dont la consternation est terrible dans le païs, qui croistra tousjours, quand le païs de deça se verra tout à faict abandonné aux armes de S. Alt.^e. - Le comte de Marcheville s'en retourne aveq un grand compliment aujourdhuy. Il est à present aux approches, pour en rendre compte à son maistre, qui ne sera pas marri de sçavoir que justement ceste nuict M. d'Estrade¹⁾, qui est de garde, a eu l'honneur de faire emporter la traverse des enemis, qui apres avoir esté mal menez là dedans tout le jour de deux pieces d'une nouvelle baterie à costé gauche de nostre sappe, enfin en ont esté chassez l'espée à la main, jusques dedans et audelà du fossé de la contrescarpe, où un petit pont ne pouvant suffire à la haste de tant de gens, quelques uns en ont esté noyez, d'autres tuez, d'autres faicts prisonniers. Un lieutenant des nostres y a esté blessé et quelques soldats, aussi entre autres Couvrelle²⁾, qui a servi de page à S.A., mais pas dangereusement. Ainsi S.A. apperçoit de jour à autre, qu'il ne sera que bien servi par ses gens, quand il trouvera à propos de les commander.

Le gouverneur de Zass m'escrivit encor hier, aveq beaucoup de complimens pour S.A., persistant à supplier que son Don Manuel de Luna³⁾ pust estre transporté en bateau, ne le pouvant par terre, pour avoir une jambe couppée par dessus le genouïl, et beaucoup d'autres blessures à la teste, en consideration de quoy S.A. ne luy a pas voulu refuser ceste courtoisie. Je ne parle plus de la disposition de S.A., parce que nous avons desjà oublié de l'avoir veu incommodée. Au camp devant le Sass de Gant, le 14^e d'Aoust 1644.

1) Zie II, blz. 358.

2) Zie blz. 28.

3) Zie No. 3679 en 3681.