Briefwisseling. Deel 4: 1644-1649

3744. Aan prinses Amalia van Oranje⁶⁾. (H.A.)*

Les enemis partants du Sass, ont laissé à S.A. sur quoy exercer sa charité. Ce sont de trente à quarante blessez dans l'eglise, couchez par terre comme des bestes, et en tel estat que nous avons peine à nous en oster l'imagination de l'esprit. Il a esté envoyé trois bateaux de Selzaten pour les y mettre demain, et un tambour des gardes les ira conduire jusqu'à Gant. - Des aujourdhuy on a commencé à demolir les approches, à quoy sert aucunement une infinité de monde curieux, qui les faict esbouler en marchant dessus de tous costez. Les remparts seront bien aysement remis en leur premier estat, mais, si je nous cognoy, c'est de quoy nous ne nous contenterons pas. La place au dedans est faicte quasi selon les execrations de l'Escriture saincte; à peine pierre y est demeuré sur pierre, et peut estre que jamais gens n'ont esté fouëttez dans une place comme celle cy tellement incommodée de toutes parts, qu'enfin à peine y avoit il aucun lieu où se cacher des bales. - Nous apprenons volontiers que le duq d'Elboeuf⁷⁾ et le mareschal de Gassion⁸⁾ - commandans par tour - ont receu ordre de la cour de maintenir ce beau poste de Watten, au moyen d'un fort royal de cinq bastions, pour la construction duquel 200 mil livres leur ont esté envoyées. De là mesme on mande que M. de Lorraine avoit commencé à marcher dès le 30^e du mois passé, et qu'on croyoit qu'il debvoit se retirer tout à faict. D'ailleurs nous sommes

6) Iets uit dezen brief is uitgegeven in Archives de la Maison d'Orange-Nassau, 2e série, IV, blz. 116.

7) Zie I, blz. 390.

8) Zie II, blz. 454.

[p. 66]

asseurez que Beck¹⁾ à mesme faict repasser la Meuse les deux regimens d'infanterie qu'il avoit detachez et envoyez vers Flandre, et s'est retiré vers Luxembourg aveq tout son gros. De sorte que ces deux secours manquans, les peuples, qui en ont esté encouragez jusques ores, se trouveront estrangement alarmez de tant de rencontres infortunez qui les accablent aujourdhuy. Grandes interdictions ont esté faictes partout contre le livret françois²⁾ que V.A. aura veu, mais c'est le moyen de le faire lire plus soigneusement. - Les gardes ont esté à ce soir relevées par sept compagnies de celles qu'a eu M. le comte Henry à Nimmeghe et Grave, qui sont entrées dans le Sass provisionellement. Au camp à Assenede, le 8^e de Septemb. 1644.

1) Zie blz. 52 en 55.

2) Zie No. 3703.