Briefwisseling. Deel 4: 1644-1649

4544. Aan N.N.³⁾ (H.A.)

Quand vous louez en moy les choses, que c'est tout au plus ce que vous pourriez faire que de les souffrir pour indifférentes ou mediocres, je regarde derriere moy à qui c'est que vous parlez. Passons ainsi cet article et venons à cet autre plus important, qui touche l'apologie que vous avez eu soin de faire pour moy. Ce Philippe le Roy⁴⁾, que vous nommez, est icy, mais s'il me rencontroit, je ne le cognoistroy pas. Il est vray que ma charge me rend cognoissable à la pluspart de nostre monde, et qu'ainsi peut il sçavoir qui je suis; mais je luy doibs ce tesmoignage que, jusques à l'heure que je parle, il semble ne m'avoir pas creu assez bon Espagnol, pour me faire solliciter d'aucune adresse ny entremise. Tant s'en fault que je la luy aye offerte, qui seroit chose aussi esloignée de la bienseance et de quelque chose de plus haut, que directement contraire à mes inclinations. Je vous prie de ne pas reçevoir ceci en forme d'excuse, car, quelque chose qui fust arrivée, je n'en doibs à personne. Je ne suis, Monsieur, ni à vendre ni vendu ailleurs qu'icy, et pourveu que j'obeisse à un maistre et l'ayde à procurer le bien d'un seul Estat, il n'y a Majesté ny Eminence qui me puisse rien demander. Pour mes affections privées, et tant qu'elles ne sortent pas de la pensée, je me les estime bien libres, et en ce sens j'ose bien advouer que vos conjectures ne se sont point esloigneés de la verité, ains que je vous suis obligé de la bonne impression que vous tesmoignez avoir gardée de moy, qui ne meritoy pas que vous en eussiez la memoire chargée si longtemps ..... La Haye, 11 Fevrier 1647.

3) Uitgegeven in Archives de la Maison d'Orange-Nassau, 2^e serie, IV, blz. 185. - De brief heeft geen adres.

4) Philippe le Roy, heer van Brochem en Olegem, raad en commies van financiën van den Koning van Spanje, kwam sedert 1646 meermalen in de Zeven Provinciën als agent der Brusselsche en Spaansche regeering.