Briefwisseling. Deel 5: 1649-1663

5823. Aan graaf de Brienne Jr.¹⁾. (K.A.)

S'il y avoit moyen de recouvrer icy une copie du testament du Prince Philippe Guillaume que vous m'avez faict l'honneur de me dire que le Roy auroit envie de veoir avant que m'expedier, je vous asseure que je me hasteroy de le produire. Cela ne se pouvant point, à moins que de l'envoyer demander en Hollande, qui pour le moins seroit une affaire de trois sepmaines de temps, que j'espere que S.M. de sa grace ne sera pas bien ayse de me veoir perdre inutilement, je vous supplie tres-humblement de luy vouloir representer que si c'est pour un passage dudit testament, par lequel on presuppose que ce Prince recommande à son heritier de mettre un gouverneur catholique à Orange, j'advouë que je me souviens d'y avoir veu quelque chose de semblable. Mais que jamais il n'a esté jugé, que cela chargeast les Princes successeurs d'aucune obligation, comme en effect depuis la mort dudit Prince Philippe Guillaume pas un des gouverneurs n'a esté d'autre religion que celle de son Maistre. Dont tant s'en faut que les subjects catholiques de ceste principauté ayent eu subject de se plaindre, qu'au contraire leurs interests ont tousjours esté autant et plus recommandez auxdits gouverneurs par les ordres et instructions des Princes que ceux des gens de leur propre religion, leurs Altesses ayant tousjours entendu qu'on eust à traicter les uns et les autres comme freres et enfans d'une mesme maison. Et puis-je bien asseurer S.M. que la commission que j'ay pour y aller regler les affaires, tres-confuses et embarassées depuis ces dernieres revolutions, ne tend à aucun autre dessein. - Obligez moy, s'il vous plaist, Monsieur, de tenir la main à faire valoir la justice de ces raisons dans celle de l'esprit du Roy, et que je ne puisse point donner ce deplaisir en Hollande, que dans la haste que j'ay de faire ce voyage, d'où on estime que je debvrois desjà estre revenu, j'aye subject de mander, comme je me trouve icy accroché sur un point auquel ame du monde n'a jamais pensé, et moins que personne ..... Paris, 27 May 1662.

1) Eene kopie van andere hand is in H.A.
No. 5823 a. Met een Latijnsch briefje van 27 Mei (K.A.) zond hij hem op zijn verzoek eenige zijner gedichten.