Van 't Herte.
THerte salmen ghesont ende welvarent houden door een vrolijck ghemoedt, lustighe exercitie, vrede ende blijschap, daerom salmen schouwen alle quade passien en verstoornissen, ooc quaede luchten ende stancken die de goede ghesteltenissen des herten bederven, en stellen hen selven tot een goet genoeghen, vrolijckheyt des herten, tot blijschap en vrede ende lustighe exercitien, ende schouwen alle quade passien, vuyle stancken ende nevelachtighe luchten. Clare welrieckende wijn gedroncken verfraeyt ende verheuht het herte boven maten seer, desghelijcx lustighe fraeye hoven, boomgaerden, ende groene plaetsen verheugen het herte seer, wel oock veranderinghe van wercken te doen brenght blijschap aen. Musijck ende snaerspel ende lustighe liedekens verdrijven wter herten droeffenissen ende verschrickinghen. Pimpernel geleyt in roode wijn ende die ghedroncken verfraeyt het herte wel matich ghedroncken zijnde, versche hoender eyrkens ghegeten genereren versch bloedt int herte. Gout, Silver, Peyrlen, Corael, Muscus, Bernagebloemkens, Confili de greyn, versterckent herte wonderlijck wel, maer boven al een gheruste conscientie, sonder welc niemant vrolijc leven mach, want die wijse man seyt: Een gheruste conscientie is een ghestadighe waerschap, maer een ongheruste conscientie brenght aen een ghestadigh lijden ende benautheyt.
Auteursrechtvrij