Den schat der armen oft een medecijn-boecxken

Beten van alle fenijnighe Ghedierten ghenesen.

CLeyne tamme Ossen tonghen cruyt in spijs of in dranck ghebruyckt, of ouer 'tlichaem ghedraghen, gheneest fenijnighe beten.

Ghedistilleert Bethoni-water gedroncken geneest fenijnighe beten.

'T sap van groote Clissen met wijn gedroncken, ende ghestooten, met sout op die beten gheleyt, geneestse.

Siedt Agrimonie in wijn en drincktse, het helpt wel.

Camille-bloemkens in wijn gesoden ende deur ghedaen zijnde ghedroncken, helpt den ghenen die van fenijnighe ghedierten ghebeten zijn.

Magheleyn of Confilie de greyn, in wijn ghesoden ende ghedroncken, ghenesen de beten van fenijnighe Ghedierten.

Item neemt Anijs-saet ende Venkelsaet, stootet

[p. 51]

en drincket inne met wijn, het is seer goet voor fenijnighe beten.

Confijte Alantwortel, is goet genut voor fenijnich ghedrochte.

Wast en reynicht den bete met wijn, ende legter op een papken van Tarwen-bloeme, ghekoockt met Wijn-azijn ende Boter.