Quade keel ghenesen.
ALbum Graecum, met wat biers ghewreven van een, ende werm mede ghegorghelt, geneest een zeere keel.
Neemt Aelbaye cruyt, weechbreeden Hoolwortel, in cleyn bier gesoden en doeter een weynichsken azijns by met wat honichs, hier mede gegorgelt, gheneest een quade keel.
Moerbesie blaen, Hoolwortel, Venckel, Aluyn, t'samen ghesoden ende dan gegorgelt, en daer nae wat rooshonich gheslickt, gheneest een zeere keel.
Neemt een swaluwe nest ende leest het stroy wt, ende sietet met suer bier ofte soete melc tot een pap gemaeckt, ende heet op een zeere keele gheleyt met eenen wollen lappe, dit is wonder goedt voor een zeere keel.
Bladeren van eenen Pruymboom in water gesoden, en daer mede gegorghelt, gheneest de pijne des keels.
Auteursrechtvrij