Den schat der armen oft een medecijn-boecxken
(1626)–Heyman Jacobs–
Auteursrechtvrij
[pagina 100]
| |
oock Alsem wijn altemet ghedroncken. Saffraen in spijse ghekoockt, is goet voor pijne des Maechs. Verjuys die van onrijpe druyven ghemaeckt wort, ghebesight, gheneest de Maghe die ghequelt is met heete sweeringhe. Die wortel van Bevernel ghedroocht, ghepulveriseert ende met suycker inghenomen, sterckt de Maghe. Peterceli wortelen ende pastinaken wortelen ghekoockt ende ghegheten, zijn goet voor een quade Maghe. Kervel warmoes ghekoockt met hutspot nat, is goet ghegheten voor een quade Maghe. Notemuscaet of folie in alder manieren inghenomen, is goet voor een quade Maghe. Centaurea in wijn ghesoden ende ghedroncken, is goet voor een quade Maghe. Siet een weynich Gembaer ende Comijn in wijn, nuttet tweemael daechs, het helpt de Maghe. Ajuyn ghebraden ende salaet af gemaeckt met oly ende azijn ende Peper by ghedaen, is goet gegheten voor een vercoude Maghe. Ses oft acht granen pepers gheheel voor den eten ingenomen, is goet voor een vercoude Mage. Mostaert tot spijse ghegheten, doet den harden cost wel verteeren. Lavas saet ghepulveriseert ende ingenomen, of die wortel ghedroocht ende ghepulveriseert met wijn ghedroncken, is goet voor een quade Mage. Cappers of Olijven ghegeten, zijn goet voor de Maghe. Desghelijckx Limoenen ende Arangen appels dienen wel tot de Maghe om te verteeren ende appetijt te maken, desghelijcx die gheconfijnte schellen van de Arangen appels ghenut, verstercken die Maghe. | |
[pagina 101]
| |
Die vochticheyt van Granaet appelen, is dienstelijck tot een quade Maghe. Oly van Folie tweemael daechs buyten op de Maghe ghestrecken, helpt tot een quade Maghe. Quecruyt ghegeten, sterckt een slappe Maghe. Gheconfijte Alantwortel, is seer goet voor een quade Maghe. Ghebranden wijn of Spaenschen wijn met een stucxken ghebraden broot, is goet ghenut voor een quade Maghe. Suerachtighe appelen ghebraden gegheten, zijn goet voor een quade Maghe. |
|