Den schat der armen oft een medecijn-boecxken

Ooghen pijn ghenesen.

ALsem met Bastaert ghesoden en d'ooghen daer mede ghewassen, neemt wech die pijne der ooghen.

Thym in spijse ghekoockt, ende soodanighe sause ghegheten, gheneest die pijne der ooghen.

Wijn daer roode roosen in gesoden zijn mede gewassen, gheneest pijne der ooghen.

'Twitte van een hinnen eye tot water gheclopt, ende in sijn werck ghemenght, doet de oogh toe en leghter een wit doecxken onder voor 'taencleven van 'thayr, ende doet dit altemet alst drooch is, het gheneest de pijne der ooghen.

Ongepijnden honich opgewelt met ley dac water, met een weynichsken witte clemy, met malcanderen ghesoden ende dan ghecleynst, ende d'oogen mede ghewassen, helpt voor pijne inde ooghen.

[p. 110]

Neemt eenen doyer van een ey, cloppet met suycker ende rooswater, ende met een erwet groot witte clemy, leght dat met een doecxken over die ooghen, het gheneest die smerte der ooghen.