Den schat der armen oft een medecijn-boecxken

Roodt melisoen ghenesen.

DIe Meesters segghen 'tsaet van agrimoni met wijn ghedroncken, is uytnemende goet voor het root melisoen.

Ganserick in wijn oft water ghesoden ende gedroncken, gheneest het roodt melisoen.

Huysloock ghesoden ende 'tsap daer af gedroncken, is goet voor den loop.

Pimpernel ghesoden ende ghedroncken, geneest het roodt melisoen.

Terwe gesoden ende ghedroncken, doet het selfde.

Savie in water ghesoden ende ghedroncken, is oock goet voor't melisoen.

Porceleyn ghesoden ende inghenomen, oft aelbesien sonderlingh ghedrooght inghenomen, gheneest het roodt melisoen.

Onrijpe moerbesien gedrooght met rooden wijn inghenomen, ghenesen den rooden buyckloop.

Soete melck met rijs gesoden ende ghegeten, is goet voor den rooden loop.

Men sal drincken bier daer stael in ghelescht is, warm, het is goet voor snijdinghe.

Roode wijn tinckt gedroncken, men maghese mengen met meeste helft staelt water, het gheneest wel.

Lamberse roode noten ghepulveriseert met de schalen, ende weechbree-saet, van elcks even veel ghepulveriseert, ende dit ghedroncken met wijn tinckt oft rooden wijn, geneest het roodt melisoen.

Stael is goet voor snijdinghe: want staelt bier conforteert het inghewant, ende is goet voor die

[p. 125]

Milt, Lever, Maghe, ende voor crancke dermen.

Item neemt warme koy-melck, ende lescht daer in dry oft vier gloeyende keyselen, ende drinckt dat soo warm, het doet den rooden loop op-houden.

Ghedistilleert water van eycken loof, inghenomen, oock het loof warm op de maghe gheleyt in een sackxken, gheneest het roodt melisoen.

Witte broodt nieuwe ghebacken in rooden wijn ghetinckt ende ghesopt, is goet gegheten voor den rooden loop.

Oft tarwen meel ghedrooght inden oven, ende pap af ghecockt, ende ghegheten, gheneest oock den bloedtganck.

Een Note-muscaet cleyn ghesneden, slaet die in een eye, ende giet dit op een heete roode haertsteen oft teghel, oft met meel ghemength, een koecksken af ghebacken, ende gegeten geneest het roode melisoen.

Onrijpe moerbesien ghedrooght inden oven, ende cleyn ghestooten met granaetschel met een ghebraden note-muscaet onder d'aschen, met rooden wijn getinckt, ingenomen, genesen 't root melisoen.

Rebarber met weeghbree-water ghedroncken, gheneest het roodt melisoen.

Slee-pruymen oft wilde pruymen ghedrooght inden oven, ende die gestooten ende 'smorgens gegeten met de steenen, gheneest het roodt melisoen.

Wortelen van witte maluwen ghenaemt in latijn Althea, in witten wijn gesoden ende gedroncken, ghenesen den rooden loop.

Vier eyeren hart ghesoden, ende die doyeren cleyn ghestooten, daer dan toe genomen een pinte karremelck wel ghesoden, ende dat dan onder een ghemenght ende ghegeten, gheneest den rooden loop.

Pitten van akeren ghestooten ende met warm bier inghenomen, gheneest het selve.

Een eye hart gebraden, ende dan heet geschelt ende soo heet in brandte-wijn gheleyt, om in te trecken,

[p. 126]

ende dat ghegeten, gheneest wel.

Oly van olijf ende Iopen bier oft ander bier t'samen ghemenght ende lau in-ghenomen, heylt den schilde dermen.

Een hillick van een ham verbrandt ende gestooten, ende met bier ende boom-oly ghedroncken, geneest het roodt melisoen.

Tormentil-wortel ghestooten, ende daer in ghedaen oly van note-muscaet, oft by faute van dien oly van folie, een half roomerken rooden wijn, ende dan inghedroncken, sal terstondt stoppen.

Soete melck stael in gelescht, ende tarwen-meel in den oven ghedrooght, t'samen in soete melck gecookt met wat stijvelis, ende ghegeten, gheneest het roode melisoen.

Warm witte broodt oft broot met oly van de lijf ghegheten met wat souts, gheneest de snijdinghe.

Heet witte broodt en leght de cruymen in boom-oly tot datse vol gedroncken zijn, ende eet dat voor den loop, het gheneest.

Rijs gedrooght in een panne, ende bry af ghekockt, ende een stuck stael oft yser in ghelescht, geneest het melisoen.

Granaet-schellen gebrant ende gestooten, ende in rooden wijn tinckt ingenomen, geneest den buyckloop.

'Tsaet van Fiecruyt, 'twelck men noemt roodtmelisoen-saet, met rooden wijn oft verstaelt water ghedroncken, oft ghewelt in soete melck ende ingenomen, gheneest het roodt melisoen.

Soetemelck al mengelende gesoden met een stuck staels op de helft, ende inghenomen, oft witte keselkens gloeyent inde melck ghelescht, is goet voor de snijdinghe ende buyckloop ghegeten.