Den schat der armen oft een medecijn-boecxken

Tandt sweer ghenesen.

DIe ervaren Meesters segghen, dat wortel van Bevernel gheknauwt, oft met azijn alleen, oft met water ghesoden inden mondt ghehouden, geneest het tandt-sweer.

[p. 135]

Mostaert-saet gheknauwt, doet wel seeveren ende veel quijls uyt de tanden loopen.

Moerbesie-bladeren ghesoden ende inden mondt ghehouden, oft de wortelen versoeten die pijn ende weedom der tanden.

Brandende netel-wortel ghekapt met eeck ende sout, aen de tanden ghewreven, gheneest tandtpijn.

Mirredick-wortel medegewreven, is goet voor tandtsweer.

Siet ysop in witte wijn-azijn, ende wascht warm daer mede de tanden.

Gersten-meel met water ende sout ghemenght, ende de tanden daer mede ghewreven, gheneest den tandtsweer.

Mater ghestooten ende op de seere tanden geleyt, verdrijft tandtsweer.