Den schat der armen oft een medecijn-boecxken

Water laden ghenesen.

WOrtelen van blau lelien met wijn ghesoden ende gedroncken, genesen de gene die't water laden.

Basilicon ghebesight, helpt oock wel.

Ruyte ghesoden met goeden wijn op de helft, is seer goet ghedroncken.

Betonie ghebesight, gheneest wel, oft radijs gegheten, helpt wel het water lossen.

Loock rau oft ghesoden ghegeten, gheneest de watersuchtighe.

Vijghen met wijn van alsem ende gersten-meel t'samen ghesoden, ende gelijck een plaester den watersuchtighen op den buyck gheleydt, gheneest watersuchtigheydt.

[p. 147]

Besight dinghen die urine ende purgatie maken ghestadigh. Raphanus inghenomen, oft ghedistilleert water, is seer goet.

Loock in vare koe-melck gesoden, ghegeten ende ghedroncken, gheneest watersuchtigheydt.

Caneel is goet ghebesight voor't water.

Heet sandt in een sacxken dickwils opgheleyt verdrooght het water.

Neemt 3. pinten petou-wijn, ende 2. loot foli, siet die in een kruyck vast toeghestopt, in't water ghestelt, en drinckt hier af 'smorghens ende 'savonts, het drijft het water uyt deur sweeten.

Water ghedistilleert van druyven die niet heel rijp zijn ende ghedroncken, verdrijft de watersuchtigheydt.