SOo wanneer een Ionghman zijn (goede meningh in) saken vande Liefde, aen een Dochter ontdeckt heeft, ende daer op alle gonst, en Vriendtschap ghenoten, vindende naderhant haer gonst in haet verandert, om dat haer het gheluck beter (na haer goet-duncken) schijnt te verleenen, soo en weet ick soodanighe Dochter bequamer niet te verghelijcken, als met eender die blindt is, de welcke in handen ghegheven wert twee stucken Gheldt, het eene Silver het ander Gout; om van beyde te keuren dat hem dunckt best te zijn, 't ghesicht dervende, kiest na 't best ghevalle zijnder handelingh, sonder seecker kennis te hebben, het sleghste voor 't beste, even alsoo gaet het veel tijts toe in 't Minnen, een Dochter van eene Ghelieft zijnde, wert ondertusschen van de tweede wel versocht, die haer aengenamer schijnt als d'eerste, sulcx dat sy met een blinde ghenegentheyt, dat is, sonder seeckerheyt, of het inder daet alsoo is, de eerste af-slaet, ende de tweede aen neemt, niet tegenstaende met de eerste groote vryicheydt ghepleeght te hebben.
Iuffrouwen, soo ghy wort ghemint,
Van eender die ghy weer besint:
En op een kort u sin verkeert,
Wt oorspronck van een quae begeert:
Oft om een dit, oft om een dat,
V gonste treckt van die s' eerst hat:
Om dat de tweede meerder schijnt,
Als ghy wel an de eerste vijnt:
Schoon ghy met d'eerste waert soo vert,
Dat ghy hem gaeft de gonst uw's hert:
't Geen ghy om yet, oft niet verkeert,
Wt mijn onwaerde Rijmpjes leert:
Hoe dat ghy door die losse daet,
Gantsch buyten Eer, en reden gaet.
Auteursrechtvrij
