1. Diferente sorto di poesia
E produktonan di literatura di tur tempu por ta redusí na dos grupo grandi, esta:
| 1. | arte di palabra subhetivo. |
| 2. | arte di palabra obhetivo. |
Den esun subhetivo (lírika) un eskritor ta ekspresa su sintimentu. E ta komunika nos su manera di pensa tokante algu, sea ku e ta hubilá o keha, sea ku e ta alabá o kritiká. Espesialmente e personanan masha suseptibel, pwes esnan ku mínimo kos ta tochi nan, lo ekspresa na fórma di arte líriko.
Si nos papia di diferente sorto di poesia, nos no ke men únikamente e ekspreshon na fórma di verso (ku rima i ritmo) ku komunmente nos ta yama poesia Obranan di prosa (novela i kwenta kortiku) tambe ta konsidera komo un sorto di poesia.
Nifikashon di e palabra poesia ta: hasi, traha, komponé.
Nifikashon di prosa ta: derechitu, koriendo. Pwes e frasenan ta sigi kore, sin ku nan ta depende di e kantidad di sílaba.
Den arte di palabra obhetivo (poesia épika) un eskritor ta konta loke el a eksperimenta o mira. E ta trata di hasi su deskripshon mas imparsialmente posibel. Pero ta masha difisil i kasi imposibel di skonde su propio opinion. Pesei nos ta topa den tur obra épiko algun parti chikitu o grandi ku ta líriko, pwes na e luganan kaminda e owtor no por dominá su sintimentu. Un persona ku por dominá su mes, esun ku tin ekilibrio den su bida lo tin preferensha pa e fórma di poesia épiko.
Den e obranan di Shon Wein Hoyer i Enrique Goilo nos ta mira e forma épiko. Mientras Pablo Alex Jesurun, Henry Habibe i Frank Martinus ta mas líriko.
Ademas di lírika i épika tin un grupo mas, esta dramátika (teatro). Un drama tin elemento líriko i épiko. Epiko pa loke e ta presenta na akshon i líriko ora e ta demonstra ki konsiderashon ta kondusi na siertu akshon.
Den poetika e palabra drama ta referi na un desaroyo tristu o alegre. Pwes tantu tragedia komo komedia ta den e konsepto di drama. Aunke den boka di pueblo e palabra drama ta uzá pa un kaso tristu.
Didáktika ta e sorto di poesia ku tin komo intenshon dunamentu di sabiduria util na un fórma poetiko.
Auteursrechtelijk beschermd