Arte di palabra

13. Epika

Un poeta ta sinti e nesesidad di ekspresa su sintimentu i ademas e tin e deseo di komunika na otro hende loke el a pasa aden.

Práktikamente tur hende ta gusta konta kwenta. Ta pesei arte épiko a nase. Epika ta nifika ‘kwenta’, ‘palabra’.

Den épika nos ta haña reprodukshon obhetivo di loke un persona a tende, mira o eksperimenta. Pero no ta esei ta tur kos. Huntu kune arte di imaginashon a desaroya. E personanan ku un fantasia grandi a traha, pa medio di nan fantasia, poko kwenta asina bon, ku eseinan ta duna impreshon ku nan a sosode realmente. Den nos tempu moderno nos ta weta, ku ademas di e arte di konta kwenta, tin e faseto importante di pone siertu orden i areglo pa e material (téknika di komposishon!!). Mientras ku promé ayá nan tabata satisfecho ku ripitishon (mas o menos) dje kwenta original.

Si nos bisa ku épika ta obhetivo, sinembargo mester observa ku kada kwenta o istoria ta sufri influensha di e kontadó (eskritor). Hende bibu no ta un aparato ku ta reprodusi un kwenta eksaktamente manera el a tend'e. Pasobra e tin su sintimentu, su opinion, su desaroyo. Pesei semper e istoria lo tin algu personal dje eskritor.

Ademas di esei kada persona ta reakshona, sigun su karakter i mentalidad riba loke e eksperimenta. Tuma por ehempel un desgrasia di owto. Si dies hende a mir'e, lo tin dies vershon diferente.

Esaki ta nifika ku obhetividad absoluto no ta eksisti den épika, maske e owtor lo trata di eliminá su sintimentu tantu ku ta posibel.

Den épika nos tin, banda di poesia, prosa tambe.

Pesei nos ke duna e klasifikashon ku ta sigi:

1.	Mito, saga, leyenda.
2.	Kwenta, fábula
3.	Parábola
4.	Idilio.
5.	Kwenta poétiko
6.	Epopeya (poema épiko)
7.	Deskripshon di biaha
8.	Relato istóriko.
9.	Biografia, owtobiografia.
10.	Novela kortiku.
11.	Novela
12.	Krítika, ensayo.