Arte di palabra

15. Kwenta, fábula

Un kwenta ta un kreashon den kwa fantasia tin kampo liber.

Su karakterístika ta su sensiyes sin límite, konektando realidad ku irealidad, transportando nos di tal manera den un mundu maraviyoso. E kwentanan popular (p.e. di Nanzi) i esnan den ‘Echa kwenta’) a nase den pueblo i den bida di pueblo. Generalmente nan ta masha biew. Kon i unda nan a originá nos no sa.

Nos mester tene kwidow ku e kwentanan di Nanzi i no kore bisa ku nan ta netamente di Afrika. Pasobra generalmente tal sorto di kwenta ta kosmopolita. No ku esaki ta nifika ku nan tabatin un fwente so, i ku despwes nan a plama riba henter mundu. Lo ta ku nan a origina na diferente parti.

[p. 18]

E tomonan konosi di kwenta ta esnan di Grimm, i esnan den ‘Mil i un anochi’.

Den e tomonan ‘Ora solo baha’ i ‘Djogodó’ tin tal sorto di kwenta.

Fábula

E palabra ‘fábula’ ta derivá di e verbo latin ‘fari’ (papia). Ke men ku un fábula ta basá riba tradishon oral. Den un fábula nos ta mira bida di hende i di animal. E animalnan ta aktwa manera hende. Loke e bestianan ta hasi i papia ta un les pa hende, pa nan no komete mesun eror. Pesei nos por bisa ku un fábula tin su obheto didáktiko. Por sierto na final di un fábula nos sa haña e moral den e ultimo frasenan.

Ta posibel pa bisa ku varios Kwenta di Nanzi ta fábula. Pasobra den e kwentanan aki nos por siña por ehempel ku mester tene kwenta ku ‘gai bibu’ manera Nanzi, pa bo no sali perdí.

E fábulanan di e griego Aesopus (mas o menos 500 P.K.) a bira sélebre den mundu. La Fontaine (siglo 17) tambe ta un kreador importante di fábula.

Probablemente e figuranan Toro Manzinga ku Toro Mansebu (den seú) ta resto di un fábula di origen afrikanu.