Arte di palabra

25. Komposishon di drama

E materia pa un drama por ta hopi o tiki. Pero tin un limitashon, den e sentido ku ekstenshon dje materia no mester stroba e presentashon. Pasobra un drama ta skibí pa ta presenta i no lesá. Pesei un dramaturgo mester perkura pa su presentashon no ta bira asina ekstenso ku esei ta eksigi demasiado di su miradónan.

Ta bon i permiti pa tene algun pausa den e presentashon. Pero esei tin ku sosode kaminda tin un interupshon natural. Di tal manera e drama lo ta partí den varios akto. E kantidad di akto por varia. Esaki ta depende di grandura dje materia. Ademas di esei por parti un akto na varios esena. Divishon den esena ta tuma luga kaminda un aktor nobo ta presenta, sea pa di promé be o di nobo.

E konstrukshon interior ta diferente. E desaroyo dje akontesimentunan mester sosode sigun un plan fiho, pa e miradónan por mira un desaroyo lógiko i un solushon natural.

Den un bon drama mester tin:

a.	eksposishon
b.	intriga
c.	klimaks
d.	katástrofe
e.	peripesia.

Eksposishon

Aki e dramaturgo mester duna un splikashon dje sitwashon na prinsipio dje drama. E splikashon mester ta kortiku pero kla, pa e miradónan haña un impreshon kla dje sitwashon, i pa nan por sigi ku interes e desaroyo dje diferente akshonnan.

Intriga

Den e desaroyo e asuntu ta bin pega. Tin un choke entre e personahenan. Bo por kuminsa mira e konflikto. E tenshon ta owmenta sigun e konflikto ta bira mas fwerte.

Klimaks

E drama ta yega su punto kulminante. E momentu di krisis ta hopi serka, sea pa bon sea pa malu. E miradó ta haña un bista den e

[p. 28]

kambio dje kaso (esaki ta kaminda, den drama klásiko, e heroe tabata realisa su sitwashon).

Katástrofe

Aklarashon dje komplikashon. Solushon di difikultad. Esaki mester sosode na un manera natural. E dramaturgo no por uza wega ni triki. Si esaki sosode, anto nos ta papia di un Deus ex machina, pasobra antes den drama nan tabata laga un dios aparese, pa duna un solushon, maske e solushon no tabata satisfaktorio.

Peripesia

Esaki ta resultado di meditashon riba e katástrofe ku a tuma luga den e di kwater akto. Den esaki ta hustifika e katástrofe komo triunfo di loke ta ‘divino’ riba loke ta ‘humano’.