Klima pa kachu
Diadumingu mainta m'a topa ku Clara na plaja di Wespen. E tabata lusi den un bikini bèrdè, ku tabata duna su kurpa koló di kané e atrakshon misterioso ku generalmente muhe riba trinta tin.
‘O, ju, ke tal?’ el a kumindami. ‘Bo tambe ta aki bòw?’
M'a salud'e ku un tiki resérva, pasobra semper mi tin masha miedu di muhenan spjertu manera Clara. Hasiendo komo si fwera mi no a gosa e bunita figura, m'a sende un sigaria, kai sinta kóntra di baranka i informa kon ta sigui ku Benny su kasá.
‘Anto bo n' sa ku nos a separá sinku luna pasá?’ el a komunikami.
Muchu e notisia no a stranjami, pasobra mi por a hole for di dia ku e ku Benny a subi altá, ku e kos ei lo no dura muchu tempu. Benny tabata e tipo intelektwal ku ta guli buki di-dia i anochi, mientras Clara ta gusta fiesta ku balia. Pa kolmo Clara tin un stem manera klok solem. I ora e kuminsa papia, su motor di boka no tin brek. Benny sa sinta kunsumi, sin por konsentra pa lesa. A la largu Benny a kuminsa bebe pildora pa kalma su nervio.
Kestion ku tin m'a grunja mas neutral posibel, pa mi hanja okashon di tende mas kos.
‘Ai si, ju’, Clara a sigui bati bai. ‘Bo mes konose Benny. Henter dia su kara ta pegá den buki. Pero ora e sali riba kaja, e no por mira un palu di basora ku shimis bistí. Mesora e ta kla pa tira flor i namora. Ma bo mes sa. Ami no sa maha mi kabes ku su pantominanan. Pasobra mi sa ku semper e ta bolbe serka mi na kas. Bo mes sa. Pidi pordon, jora, priminti ku nunka mas. Esta fantochi, bo n' ta hanja?’
M'a bolbe grunja i komodá mi lomba kóntra di baranka.
‘Anto asina e píntol ripara ku m'a pordon'e, e ta bolbe sambujá den su malditu bukinan. Figurabo ku e homber tin kurashi di sinta lesa te tres or di marduga. Ta di mas. Bo mes no ta hanja?’
Tur loke m'a riska duna komo mi komentario tabata un ‘Se, se, se’ un poko vago. Pasobra mi sa ku miho un hende hinka su dede den nèshi di maribomba, ku mete pata den asuntu di hende kasá.
Ku mi boka na kandal m'a sinta tende henter un historia largu ku Clara a sigui konta di tur Benny su mil i un amorsitanan pasahero. Pero mientrastantu un otro pelikula tabata pasa den mi sintí: Clara, bistí manera un kondená, penjá, pintá, banjá ku perfume, ta kamna lastra riba kaja, na kas di tur su amigu i amiganan, chalalando tur sorto di redu i ultimo notisia. Tin be te anochi lat den auto di su amigu preferí.
‘Ami ta gusta sali bai keiru un poko anochi’, Clara a sigui ble-ble den mi kabes. ‘Pa tuma poko airu fresku. Ku un... eh... amigu di mi. Den su auto nobo, furá tur na kweru kòrá paden. Un mucha homber masha desente. No komprondemi robes. E ta biba masha desente ku un aktuprimu di mi. Ai, ju, nos ta keiru masja dushi mes’.
Clara a pausa un ratu i dal un gritu hari masha kanaja.
Auteursrechtelijk beschermd