Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Komme dy kepers? Boef fan Rys (2001)

Informatie terzijde

Titelpagina van Komme dy kepers? Boef fan Rys
Afbeelding van Komme dy kepers? Boef fan RysToon afbeelding van titelpagina van Komme dy kepers? Boef fan Rys

  • Verantwoording
  • Inhoudsopgave

Downloads

XML (0.40 MB)

tekstbestand






Genre

proza

Subgenre

detective


In samenwerking met:

(opent in nieuw venster)

© zie Auteursrecht en gebruiksvoorwaarden.

Komme dy kepers? Boef fan Rys

(2001)–R.R. van der Leest–rechtenstatus Auteursrechtelijk beschermd

Vorige Volgende
[pagina 96]
[p. 96]

16

‘Reagje dy gniis fan syn snút,’ kommandearret Sipma.

Rútsjeshimd hellet foar de safolleste kear út en raamt in bearefûst yn Nier syn troanjemint. Dy hat in gefoel syn noas sit net oan mar yn syn gesicht. Mear fielt er ek net. Se ha him murf slein.

‘Myn geduld is útpoept, wêr is it?’ skreaut Sipma mei oer slaande stim. Yn syn skylpodeagen glinstert in koartsige gloed.

Nier spuit in mûlfol bloed út. Sels spuien falt net ta. Oer syn kin en hals hinget in pikkige reade slabbe. Hy sit ûnwrikber op in stoel fêstbûn, allinne syn holle skoddet as in boksbal.

‘Wat?’ freget Nier.

‘Kristensiele, begjin net wer! It!’

‘Sis dan wàt.’

‘It!’ Sipma knipt mei de fingers. ‘It, it, it, it, it.’

‘Jim witte sels net wat jim bedoele.’

‘Dit!’

Bats, kriget er wer in opdonder. De lampe begjint te slingerjen, de keamer te giseljen en Sipma stiet yn alle stannen foar him behalven rjochtop.

‘Wêr is it?’ blaft Sipma him ta. Hy triuwt Rútsjeshimd syn fûst fansiden. ‘Net te bot. Hy moat bûtendoar ek toanber wêze.’

‘Jo ha gelyk,’ seit Rútsjeshimd ienfâldich.

No net flaufalle, tinkt Nier, hoe noflik it ek wêze soe. De kop der by. Se sykje grif de houten skonk. Ik ha trije adressen. Efterreed 6 yn Fochtelo is te iensum. Dêr slaan se my hartstikkene dea. Münster

[pagina 97]
[p. 97]

& Keulen, De Sweach, liket better, mar is minder. Dêr ha se rêchdekking fan befoege autoriteiten. Bliuwt oer Ljouwert. Ljouwert is it plak foar my.

‘Hotel Atlantis, Ljouwert,’ komt tagelyk mei in poarsje bloedbobbels oer syn lippen.

‘Dus dochs!’

De mannen sjogge inoar follebetsjuttend oan.

‘Dy doerak,’ seit Sipma, ‘hy spilet dûbeld spul. Hie 'k it net tocht? Wy moatte him foar wêze. Kom, der op ta! Hy giet mei.’

Kiki makket har út de hoeke fan de keamer los.

Se hat de haakte wite jurk fan Dynte oan. It is mear gat as jurk en se kin it stik klean net hielendal mei har foarmen folje. It hat in miskar west, mar dat beseft se gelokkich sels net. De wite hoazzen fan Ungaro dy't krekt boppe de knibbels ophâlde, passe better by har figuer.

Se strykt in finger by Nier syn wang lâns. ‘Sa kin er net mei. Se sille tinke wy binne slachters.’

‘Binne wy ek.’

‘Mar se meie it net tinke.’

‘Dat is dyn slach. Hoffenje him wat. Wy meitsje risselwaasje. Oer fiif minuten moat er toanber wêze.’

‘Wachtsje even,’ pipet Mûs. ‘Foardat it net mear kin. Ik moat ek myn gerak ha.’

Hy roait sekuer en slacht syn fûst tommedjip yn Nier syn gesicht. De manlju laitsje.

‘Do bliuwst hjir,’ seit Sipma oan Rútsjeshimd.

Hy giet mei Mûs de keamer út.

Nier is him heal bewust wat Kiki mei him docht. Hy fernimt temperatuerwikselings op syn holle. Wol tweintich kear stammert er: ‘Meitsje my los.’ En wol tritich kear: ‘Hast my te fiter hân.’ Wurden dy't net freegje of ferwite. Gewoan wurden. Lêste oerbliuwsels út in fier ferline doe't de wrâld noch normaal funksjonearre. Neffens de wetten fan oarsaak (of oanlieding) en gefolch. Hy is no yn in oare wrâld. Syn bewustwêzen fernaut. Hy praat en praat mar om net te beswimen. Ynienen begjint Kiki te flústerjen. Har

[pagina 98]
[p. 98]

stim komt troch in mist op him ta. Hy harket mei alle fermogens dy't noch yn him binne. In folslein harkjen. Soms rekket er even yn 'e sûs, dan lûkt dy stim him der wer út. Syn bewustwêzen ferrommet. Hy sjocht Kiki noch net, mar hy fielt har fingerseinen.

‘Ferdomme, ik doar dy net los te meitsjen, jonge. Ik hie dy dit besparje kinnen. Hast it sels ferknald. Do litst dy leaver twa oeren lang troch in pear hufters bûksiik slaan en seist by eintsjebeslút dochs watst net kwyt wolst.’

‘Koes,’ warskôget Rútsjeshimd.

‘Kiki moat dyn gesicht yn fiif minuten opkalefater je. It duorret wol fiif jier ear't dat wer yn bytsje liket. En it is allegear fergees. Se sille dy likwidearje sadree se it fûn ha. Se skrilje foar neat tebek. Dit wurdt dyn lêste moarn, dyn lêste dei op syn heechst.’

‘Kiki!’ ropt Rútsjeshimd ferbolgen.

‘Mar dit sis ik dy, Nier Hinnebruier, ik woe ik hie dy ûnder oare omstannichheden moete. My tinkt, wy hiene ridlik meiinoar opsjitte kinnen. Kiki Rascall eks-prikelpoppe fan Jimmy Angler en Nier Hinnebruier eks-frijfeint fan Dynte Planteit. Is it net om jo te fergriemen?’

Rútsjeshimd jout har in snútslach.

Triennen springe Kiki yn de eagen. Se stampt mei de foet op de flier. ‘Ik bin it sêd as spein spek!’ kriezet se. ‘Ik ha balen fan jim!’

De doar giet iepen, Sipma en Mus komme der yn.

‘Wat bart hjir?’

‘Kiki is hystearysk,’ seit Rútsjeshimd.

Sipma sjocht har lyk yn de eagen. ‘Hast it wer op dyn heupen?’

‘Ferjit it,’ andert Kiki, ‘ik moast even wat kwyt.’

‘Krekt in pafferige jeneverholle dy't him foar it earst sels skeard hat,’ nokkert Mûs wylst er op Nier wiist.

‘Mmm,’ grommet Sipma, ‘it kin der op troch. Kom, opsjitte.’

Mûs en Rútsjeshimd meitsje Nier los en nimme him tusken har yn. Syn fuotten meitsje rinnende bewegings, mar se reitsje de grûn net. Foar de efterdoar stiet in persoanewein. Se skowe en lûke him op de efterbank en gean beide oan in kant fan him sitten.

[pagina 99]
[p. 99]

Kiki set har foaryn neist Sipma del. Nier sakket wei yn de kessens en in flaute.

Hy komt by troch in tút op syn tebarsten lippen. Se stean foar hotel Atlantis. It earste moarnsljocht spegelt yn de boppeste ruten. Op it parkearplein is it noch tsjuster. Rútsjeshimd hâldt de doar iepen. Mûs en Kiki bliuwe sitten.

‘Rinne,’ seit Sipma.

Nier krûpt út de auto en besiket it. By elke stap fielt er syn ûnderskonken troch syn knibbels sjitten, mar hy komt foarút.

Sipma kloppet him op it skouder.

‘Brave jonge.’

In geweldige flagge dekt de beheinde lading fan de resepsjoniste. Boppedat sit it fanke oer in krúswurdpuzzel gear. Dat sadwaande. Sûnder swierrichheden komme se by nûmer 259. Sipma skellet oan. Suver op itselde stuit giet de doar iepen. De ferwachtingsfolle glâns op Nice syn gesicht ferkrampt ta in bekaaide útdrukking.

‘O, binne jim it,’ seit syn tramtearre stim.

Se stappe de keamer yn, Sipma lûkt de doar efter him ticht.

‘Kinne jo dizze man?’ freget er, wylst er Nier syn holle by it hier rjochtop hâldt.

‘Noait sjoen,’ seit de Amerikaan sûnder benijing.

‘Gjin babbelegûchjes, Nice. Dit is ús slach. Wêr is it?’

‘'k Wit net.’

‘Kom, kom.’

‘Ik ha it wier net.’

Sipma suchtet. ‘Alles trochsykje,’ kommandearret er.

Rútsjeshimd stapt foar it front en roppet Nice de klean fan it liif. As dy yn it poerneakene stiet, hat er it noch net fûn. Dan smyt er alles oer de kop. Skaakstikken kletterje oer de flier, matchbulletins dwarrel je yn de baaikûp, in hiele garderobe giet nei de barrebysjes. In kertier letter hat er it noch net fûn.

‘Neat,’ merkt Rútsjeshimd oerboadich op.

‘Ik sei it dochs,’ prevelt Nice.

Nier slacht hast tsjin de flakte fan it stean.

De telefoan rattelt.

[pagina 100]
[p. 100]

‘Opkrije,’ kommandearret Sipma. ‘En gjin smûsjes.’

Nice nimt de hoarn fan de heak. Hy begjint oer syn hiele lea te triljen, mar net omdat er neat oan hat. Syn gesicht lûkt jiskekleurich wei. As er oplein hat, bliuwt er rûngear mei de holle tusken de bonkige knibbels sitten.

‘Wat is der oan?’ freget Sipma.

‘Platfoet is dea.’

‘Is dat sa slim?’

‘Dy hat it.’

‘Wa seit dat?’

‘Keulen.’

‘Moai, no sitte wy op deselde golflingte. Op nei Keulen!’

‘Wie dat alles mar. Dynte Planteit is ûntkaam.’

Sipma stekt de hiele fûst yn syn eigen mûle, Rútsjeshimd haffeit op in strik fan Nice om en de Amerikaan lit in wyn. Nier giet der by sitten.

‘Wy wurde wol besocht.’ Sipma kriget it earst syn praatfermogen werom.

‘It wurdt in ôfgong,’ stint Nice.

Sipma fermannet him. ‘Skyt, ôfgong. Net mear blunderje, dat is alles. Ik ha ek noch in ferrassing foar jo meibrocht.’

‘Ferrassings kin ik net mear ferneare,’ kreunt Nice.

‘Kiki Rascall, ús troefkaartsje.’

Nice gappet nei de siken. ‘Ek dat noch.’

Moedsum strûpt er syn klean oan. Rútsjeshimd leit de bringst wat te plak en Sipma skriuwt yn in boekje. Dan gean se fjouweresom nei ûnderen ta. Se strûze de auto yn en begjinne allegearre tagelyk trochinoar te razen. Kiki is fuort.

‘Se hat my ferlokke,’ pipet de Mûs boppe alles út.

‘Dat smoarge fanke,’ giert Sipma, wylst er him by de krage krijt.

‘Wêrom hast ús net warskôge?’

‘Ik woe jim net steure.’

It roppen en razen giet troch.

‘Kalm!’ skreaut Sipma oerstjoer. ‘Wy moatte rêstich operearje!’

Hy hat Mûs by de strôt en triuwt him hast troch it rút. Ut en

[pagina 101]
[p. 101]

troch knypt er even minder fûl om lucht foar antwurd te jaan.

‘Do komst mei Kiki werom. Begrepen?’

‘Ja, baas.’

‘Noch wat te freegjen?’

‘Nee, baas.’

‘Do makkest dit hear kâld.’

‘Ja, baas.’

‘Noch wat te freegjen?’

‘Nee, baas.’

‘As 't mislearret, is 't dyn dea.’

‘Nee... ja, baas.’

Sipma lit los. Mûs en Nier stappe út. De auto stoot fuort.

Se rinne troch de stilste strjitsjes. Gjin minske op 'e dyk. Protters kwetterje yn de dakgoaten. Dit is har tiid. Aanst sil it stedslawaai har oerstimme. It ljocht sakket starichoan tusken de huzen. ‘Ik wit in moai plakje,’ slikkeburdet Mûs. ‘In plakje dêr't nimmen ús heart, sjocht en fynt. De iene syn dea is de oare syn brea.’

Sil ik der fuortendaliks mar by lizzen gean? tinkt Nier. Miskien docht er it midden op 'e dyk net. Mar as er oer it skouder sjocht, wit er dat neat syn eksekuteur keare kin. Twa moardsuchtige eachjes beloere him.

Se komme by de Noarderbrêge. In plysjeman swaait om de hoeke, stapt fan syn motor en begjint de eintsjes te fuorjen. ‘Hisp, hisp, hisp,’ ropt er.

‘Trochrinne,’ lústert Mûs.

Se binne de plysjeman al hast foarby, as dy him omdraait. Der giet in skok troch him hinne. Hy sjocht Nier op en del oan. Dan skonket er op syn krûme kûtlearen bargefangers rêd tichterby.

‘Ken ik jo net?’

‘Ja,’ andert Nier bliid, ‘fan de befalling.’

‘En fan de begraffenis,’ knikt de plysje.

‘Just,’ glimket Nier.

De plysje spytgnysket. ‘Is it diskear mislearre?’

‘Hoe bedoele jo? De befalling of de begraffenis?’

‘Om in oar yn 'e knûkels te riden. Jo sjogge der út as de klokkelieder

[pagina 102]
[p. 102]

fan de Notre Dame.’

‘Krapte oan klanten.’ Nier wiist mei syn tomme nei Mûs. ‘Hy is myn takommene slachtoffer.’

‘Litte jo dat samar gewurde?’

Mûs seit neat.

‘Wêr sille jim hinne?’

‘Freegje him mar,’ wiist Nier.

Mûs byt op de lippen.

‘Nei it Diakonessehús, koartby. Jo moatte ús even eskortearje,’ seit Nier.

‘Foar in harsenstransplantaasje seker?’ swietmûlket de plysje.

‘Nee, foar in fuotbalknibbel.’

‘Nei it buro!’

‘Graach.’

‘Tink der om, alles wat jo sizze kin tsjin jo brûkt wurde. Oertrêding fan de maksimum faasje, mislieding en mislediging fan it wetlik gesach. Dat is noch al wat.’

‘Fyn ik ek. Nim my mar gau mei.’

‘As jo dan sa goed wêze wolle en stek de poatsjes út?’

De plysje lûkt in pear hânboeiens foar it ljocht.

Mûs springt tusken him en Nier. ‘Hy is myn man!’ pipet er.

‘O ja?’ gniisgappet de plysje.

‘Jo meie him net meinimme!’

‘Wolle jo jo der bûten hâlde?’

‘Hy hat neat dien!’

‘Wol wier,’ seit Nier, ‘ik ha in hiel soad dien.’

‘Wy heare byinoar,’ pipet Mûs hertstochtlik.

De plysje betomket syn fjouwerkante kin. ‘Wer sa'n nijmoadrige ferhâlding. Goed, dan gean jim tegearre mei. Stek de poatsjes ek mar út.’

As Mûs syn poatsjes útstekt, sit der in revolver yn. Hy giet op de teannen stean en set de loop op de sliep fan de plysje. Syn finger lûkt de hoanne. Nier springt mei beide fuotten ta. Hy rekket Mûs fol yn 'e rêch. Dy knikt nei foaren. De revolver skampet by de sliep lâns as it skot ôfgiet. Wanwichtich stean de twa mannen

[pagina 103]
[p. 103]

mei swaaiende earms op de uterste râne fan de kade. Ien setsje fan Nier syn wiisfinger is genôch. Plysje en Mûs meitsje in salto en trûzelje tusken de einen.

Nier set de sokken der yn. It docht sear, mar it is in noflike pine, lyk as fan in wûne dy't helet. Dêr kin gjin supersoanysk fleantúch, gjin fûleindige auto, gjin pittige brommer tsjin út. Dit moatte je sels ûndergean. De frijheid op je eigen fuotten temjitte te rinnen.

As er yn de Baginestrjitte is, heart er in fluitsje efter him snerpjen. Hy hat de ein yn de bek. Op syn lêste reserves wankelt er de Sint-Antonystrjitte yn. Efter in boekebeam sjocht er in sket. Hy wrakselt der oer hinne, krûpt efter in pear stikkene laaiplaten en falt mei de rêch tsjin de Westertsjerke yn 'e sliep.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken