Kribbelkes. Gediechskes in 't Mastreechs

[p. 60]

III. Vaan Fieste En Hèllege

Advent.

Ao, hiemele dauwt neer
de lang en lang verwachte,
daan kump 'n ind aon 't wachte...
Gelök, dat kriege veer.

God kump weer es e keend
en truus en brink weer leefde.
Wie Heer ze us gereefde
is dat nog wel verdeend?

De wereld sjmach nao vreij
en kin ze mer neet vinde.
Meh wieväöl stoon 'rs in de
reij veur 't stelke... werk'lik bleij?

Me zeukde neet bij Uuch
nao 't groete vredeswoonder,
en toch kin me neet zoonder
Uuch, de bron die noets verdruug!

Noe raak de nach ten ind,
de lochte goon aon 't klaore!
- - - - - - - - - -
Wee zal 't Keend bewaore
wat m'in 't stelke vind?