Kribbelkes. Gediechskes in 't Mastreechs

[p. 77]

Paostied.

Bedèk zien de kruzer mèt deuk vaan maof,
De kleur vaan de boete en 't leije.
Bedèk wie Zie leve, wie Heer Ziech begaof
In 't verborge um veur sterkde te beije;
En sjus wie Heer dao in 't verborgene goong
Tot de tije ziech zouwe voltrèkke,
Zoe ouch heet de kèrrek vaan wie zie bestoong
De kruzer mèt maof doen bedèkke.

Zien Godheid veural verborg Heer toen
Um miejer es mins nog te leije,
Um deeper te veule nog wat Heer goong doen.
Wee begrip vaan die leefde de reije?
Zoe ouch is de Godheid verborrege noe
Oonder kleure vaan leid en vaan boete,
Meh hoegerop zien veer 't Kalvariekruus boe
Veer de Leijer en Verlosser begroete.

't Aaid testemint dat heet 't veurzag
Wie ins Heer zou leije en sterve.
't Nuit, dat zeet us wie Heer us bedach
En d'n hiemel veur us goong verwerve.
Twie tije zien dat, boe-in väöl is belaof
En veer ouch väöl höbbe gekrege.
Twie weke bedèkke de kruzer mèt maof,
Daonao kump de blijdsjap en zege.