Vermakelijcke bruylofts-kroon, doorvlochten met verscheyden leersame gedichten

[p. 38]

[Alle dingen heeft sijn mate]

Het is een eere voor een Maeght,
Die alle dinck in mate draeght.

ALle dingen heeft sijn mate,
In het doen of in het laten,
Alle dinck dat heeft sijn merck,
Sijn beset en vaste perck.
Hoort ghy Vrijsters, wilt hier leeren,
En dit lesje tot u keeren,
Gaet doch nimmer als een slet,
Slordigh, vuyl en gants besmet,
Al te slordigh kan u deeren,
Niemant sal u willen eeren,
Yder sal door dit gestel
Seggen dat 's een slordebel.
Bruyn en eerlijck dat mach wesen,
Dan soo wort die niet mispresen,
Als ghy houdt de middel-maet,
Dan soo blijfje van de praet.
Als een Maget gaet uyt steken
Trots en moedigh, wil nau spreken,
En gaet proncken al den dag
Meerder als haer staet vermagh,
Daer sal yder een van kallen,
En geduerigh staen en rallen,
't Is voor u de beste wet,
Niet te slordigh noch te net.