Tot den Christen Leser.
VVY worden daghelijcx gheleert ende vermaent, dat Godt niet alleenlijck Rechtvaerdich is, maer oock Barmhertich. Sijn rechtvaerdicheyt siet op onsen verdiensten, die niet cleyn en zijn. Want door het stadich toenemen van onsen sonden, als van suypen, brassen, proncken ende hovaerdich pralen, mitsgaders lieghen ende bedriegen, ende t'ghene wy nu verswyghen, verwecken wy Gods torn om sijn straffe te laten gaen over landen ende luyden: Maer sijn barmherticheyt is so groot dat hy ons laet waerschouwen door sijn extraordinaris boden, als nu door dese Hemels Trompet ende Morgenwecker, op dat wy met die van Ninive ons tot God kerende met vasten ende bidden, met schreyen ende wenen, die wel verdiende straffe moghen ontgaen. Dat gonne ons Godt door sijn grote barmherticheyt. In Groninghen den 19. Decembris 1618.
Auteursrechtvrij