Verscheyden bruyloft dichten ende liedekens ghedicht ende gecomponeert by verscheyden gheesten

[p. 36]

[Dit is der Musen sanck, dus heb ickt op gheschreven]

Dit is der Musen sanck, dus heb ickt opgheschreven,
Soot niet wel is ghemaeckt, soo vvilt het my vergheven,
T'is niet der Musen schult, maer mijns, tis my ontvallen,
Aenneempt dit werck in danck, dat bid ick van u allen,
End' op dat ick oock vvinsch, Bruyd'gom en Bruyt verheven,
Soo vvinsch ick u voor eerst een lanck voorspoedig leven,
Op dat ghy aen u disch, kints kinderen moecht vergaren,
Van twist tweedracht, discoort, moet u God oock bewaren,
Godt gheef u gheen armoet noch ooc rijckdomme veel,
Want armoet maect gekijf, bedroeft den mensch gheheel,
Rijcdom maect gulsicheyt, dus moet ghy tusschen beyden
In dit bedroefde dal u leven matich leyden,
Godt gheef u beyd' de tijt, die Nestor heeft ghehadt,
Op dat ghy beyd' te gaer, u leven zijnde sadt,
Wt dees bedroefde werlt, na swaricheyt end' lyden
By Godt u eeuwichlijck te samen moecht verblyden.

FINIS.