Princelijcke deuijsen

[fol. 47v]

Scilicet is superis labor.

[fol. 48r]

Een serpent oft slanghe haer ghewonden hebbende ronts omme de sluetel, die aende poorte was hangende van Leontychidas raetsheere vander stadt van Lacedemonien, so maecten de wijchelaers oft waerseggers daer groot werck af, segghende dat sonder faute een wonderlijck teeken was, ende dattet wat te bedieden hadde. Waer op dat Leontychidas antwoorde: Mijns aengaende soo en dunct my niet dattet yet sonderlincx heeft te bedieden, dat een slanghe oft serpent haer heeft gewonden ronts omme eenen sluetel: maer hadde de sluetel gewonden gheweest, ronts omme die slanghe dat soude my duncken te wesen een wonderlijke saecke die wat te bedieden hadde. Ende also berispte hy seer ghenoechelijck haerlieder dwase supersticie ende valsch ghelooue: waer mede voorwaer het volck heden sdaechs seer besmet is, twelck hem seer lichtelijck verwondert in saecken die by eenighe gheualle toe comen, de welcke nochtans niet en sijn bouen nature. Maer alle dinghen wel ouerdacht sijnde, soo ist te vermoeden dat tselue toecoemt by ghebreke van goet verstant, oft by faute van ghelooue, twelcke door eenighe valsche consten is voedende sulcken crancken verstant onder die menschen.