Princelijcke deuijsen

[fol. 141v]

Terriculum noxae.

[fol. 142r]

Als die groote Pompeius gemaect was⁺ opperveltheere ende van Sylla gesonden in Sicilien, so en hielt hy hem niet alleene als een cloeck, stout ende neerstich prince, maer regeerde hem seluen seer rechtueerdelick leuende als rechtueerdich capiteyn. Want de ghene van zijnen volcke, die hy hoorde dat afghetrocken waren wter benden, ende hem houdende int velt om te roouen ende stelen, dede hy swaerlick straffen. Ten anderen omte bedwinghen zijn voorlopers oft lichte ruyters, sonderlinge om dat hy die soude bewaren van gewont te wesen, oft van yemant ouerlast te doene, soo seghelde hy wel neerstelick alle haerlieder rapieren met zijn eygen signet.

+ Plutar.