Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Bouck der bloemen (1904)

Informatie terzijde

  • Verantwoording
  • Inhoudsopgave

Downloads

PDF van tekst (0.93 MB)

XML (0.42 MB)

tekstbestand






Editeur

Stephanus Schoutens



Genre

proza

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Bouck der bloemen

(1904)–Dirc Potter–rechtenstatus Auteursrecht onbekend

Vorige Volgende

Dits vander xxiiiister ende een snode bloem gheheiten ongherechticheit

Hier valt te spreken vander ongherechticheit aechtervolgende onse opset als bij elke doecht die ondoecht te setten. om een onderscheit van beiden te hebben als voerseit is. Daer af mij dunct dat ongherechticheit des duvels echte suster is. want wij se trouwet die wort verenicht mit den duvel. die allen onrecht verwart ende bestuert so hij een coninc is vander ongherechticheit ende alle quade lose saken daer die minsche mede in sijn stric comen mach ende alsoe verloeren blieven.

Soe wie den anderen tsijn nemet het sij mit crachte of heymelijck steelt

[pagina 77]
[p. 77]

of den anderen misdoet an lieve of aen goede. of mit loghen tsijn ontughet of valsche vonnisse draghet of den anderen verscalct mit cop aender mate aender ellen. Of mit logenachtighen worden beclaecht ende bedriget of den bosen sterket teghen den goeden. Of meer begert dan tsyn ende een yeghelijken niet en gheft dat sijn is. Dit is een ongherechtich minsche ende valsch voer gode ende voer die werelt. Die menighe staet in groter ernste na goet weder hijt crijghet of niet het sij mit rechte of mit onrechts dats hem al ghelijck. Die loy seit ten wort geen sonde vergheven het en sij dattet onrecht dat den anderen af getoghen is weder keert is. Onrecht valt vele inder werelt: want elck wilt groet rijck ende machtich wesen. Ende als hijs dan mit rechte ende mit eeren niet werven en can dan soe aventuert hij die edele ziele die daer om inder ewicheit moet wesen verdoempt.

Daer om machmen die ongherechticheit ghelijken bijden wolf diet al mint dat hij becrachtighen mach tot sijnre vollinghe het sij mit rechte of mit onrechte dat en cavelt hij niet hij stiecket al in sijnen sack het sij scaep gans calf hoen of wat dat is hij slacht volcomelijc den ongherechtige minsche diet al aen hem trect dat hij siet of crighen van. Als woekers. voercopers wisselars moentenars ende dier ghelijke hoe sij aan goet comen dair vraghen sij niet na op dat sijt hebben. Sij slachten den ghierighen sij eten den armen luden ende hoeren sweitighen arbeit trecken sij aen hem ende leven daer af totter tijt doe datse god van boven neder werpt ende varen in des duvels gheleyde.

Die een dinc coopt om dat gheheel over te gheven winninghe daer af te nemen ende dat selve onvermindert weder te hebben dat is die coepman die onse heer wten tempel stiet. Daer om soe is die woekerar ongherechtich ende boven allen coopluyden vermaledijt dat seit crisostumus. Die heilighe scrift vermaent ons ende verbiet wokeren ende alle ongherechtighe bloedeghe saken. Sij seit die van sijnen nabuer woeker niet en nempt die sal wonen inden tabernacule gods ende onse heer gruwelt vanden valschen man die bloedich sijn. Als valsche ongherechtighe lude die rechters heiten ende onrecht doen die den onnoeselen tsijn neemen sonder recht sonder vonnisse ende mit recht nie lijff en verborden. dat huden dages vele inder werelt valt ende namelijc in landen daer partyen sijn ende wes daer geschiet dat comet al op haers heren ziele. Want een heer die partije dracht in sijn selfs lande die is valsch ende ongherechtich tot god ende ter werelt.

Die gherechticheit en wilt gheen persoen wt nemen sij sijn allen des heren lude. hij sal die goede minnen ende stercken die quade ongherechtighe ende mesdaders casteyen een ongherechtich minsche en staet nummermeer vast hij is altijt duchtende hij kent hem selven ende heeft altoes anxt dat hem die oude sonden sullen slaen. Die ongherechtighe boese minsche vliet eer hij ghejacht wort die rechtverdighe staet vast betruwende hem selven als een leewe ende sonder anxt. Alsoe als vele goeder heeren ende ander lude dicke hoer gerechticheit in doechden van gode ghenoeten hebben. Soe heeft oec menich groet vorst ende ander qualic ghevaren ende verdoempt gewest ten ewighen tormente overmits haer ongherechticheit ende quaden wille.

Alse inden iersten cayn die sijnen broeder doode. waert doot ghescoten van enen blinde. Absolon sterf hangende mit sijnen hae aen een eyke die

[pagina 78]
[p. 78]

sijnen vader mit onrecht verdreef ende teghen hem street om dat coninckrijck van israel. Joab waert ghedoot om dat hij den hoeden amasan verradelijck doot ghesteken hadde. Pharao die coninc van egipten verdranck mit allen sijnen hoep om dat hij dat gheslechte van juda verderven woude. Alsoe voer oec holofernes die van eenen wive ghedoot waert. ende chore. dathan ende abyron versoncken inder erden. Ende sommighe verbernden mit al horen gheslechte omdat sij onrecht spraken op moyses ende aaron. Ende hem onderwonden heerlicheiden die hem niet toe en hoerden. dat god voer alte groet ovel nam alst wel scheen. Abimelech was een baestart gedeons soen ende versloch .lxx. sijnre ghetruder broederen ende regneerde na sijnen vader mit fortse teghen gode ende teghen recht ende wart doot geworpen van eenen wive mit eenen stuck van eenen molensteen. Aman was mit onrecht ghestelt op dat joedsche gheslechte te verderven. ende wart ghehanghen aen eenre galgen .xl. cubitus hoghe die hij voer enen joede hadde doen maken. Jesabel dat boese wijf van israel nam den goeden naboth sijnen wingaert ende deden sterven mit onrechte ende mit valschen inghesetten tughe ende dede oec die propheten doden Dese viel op een tijt van boven wt den palleyse tenen vinsteren also cleyn ghebroken dat die honde hoer vleysch ende bloet aten soe die wrake gods dat eyschede. Die valschen papen gaven onrecht vonnisse over susanna. Daniel die propheet ondervant haer valscheit ende sij worden ghesteent. Deser wet ic veel meer oec valter nu inder tijt vele dat god dat ongherechtighe bloet wrect ende slaet die ongherechtighe mit groten slagen des men kenlijc proeven mach. Daer om waer onrecht gelaten ende recht ghesterct dan mochten wij in gods hulde vort gaen ende allen onse saken souden ten beesten keeren. Want sonder twievel alsoe langhe als wij recht mit onrecht ende onrecht te recht maken soe en sal ons nummermeer goet noch doecht gheschien.

 
Lieve vriende weest gherechtich.
 
Ende sterct recht als ghij sijt mechtich.
 
Vliet onrecht daer ic af spreke.
 
Op dat onrecht u niet en steke.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken