Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Bouck der bloemen (1904)

Informatie terzijde

  • Verantwoording
  • Inhoudsopgave

Downloads

PDF van tekst (0.93 MB)

XML (0.42 MB)

tekstbestand






Editeur

Stephanus Schoutens



Genre

proza

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Bouck der bloemen

(1904)–Dirc Potter–rechtenstatus Auteursrecht onbekend

Vorige Volgende

Vander xxvijster ende een goede bloem gheheiten. miltheit.

Een lieflijke blome die seer bequaem was ende lovelijc vant ic mede in den corve die gheheiten was miltheit. Ende is soe mij dunct eene bequame vrijheit van hertten gerne ende vriendelijc te gheven vanden sijnen. ende teghen der eeren niet scandelijck te houden dese doecht van miltheit is seer gheprijst ende geloeft onder allen goede eerbaren luden want sij is wel dat beeste cleet dat die eere heeft aen te trecken. Eer en mach doch sonder miltheit niet wesen. mer dan hoesheit sonder scampte.

Dese machmen compareren ende ghelijken bijden aer die een coninc is van allen voghelen. Sonder twivel die recht milde is die is te prijsen boven allen ander minschen ende hem betaemt wel groot van machte te wesen. Wanneer die aer eenen roef ghehaelt of enich aes gevanghen heet dair hij sijn voetsel af nemet. Soe comen dan ander voeghelen groot ende cleyn bij hem want sij volghen hem daer om nae alsoe grote heeren veel lude voeden. Dan tasten sij mede totter spijsen ende is soe edel van natueren dat hijt hem allen mede deylt ende laetse mit hem eten. Mer ist dat hij ghebreck heeft soe tast hij omme ende neempt dat hem naest is. Also ontgelden sij bij wijlen die hem verwanen opter heeren hulde. Men seit int ghemeyn het is mit heeren quaet keerssen eten. Het betaemt den heeren wel milde te sien voer ander luyde want sij leven der luyde. Ende alsoe sijt lichtelijc ende sonder arbeit of sorghe crighen. soe sullen sij billic te blijdelijker ende mildelijker geven. Dats te weten daer sij billijker ende mit eeren sullen gheven.

Alte veel ghegeven boven maete dats een sonde gheheiten in latijn prodigalitas. Ende is een roekeloese ende onmate miltheit daer een minsche heit sijn bij quijt wort ende niet en hout soe dat hij in armoeden sterven

[pagina 84]
[p. 84]

moet. Daer om segghe ich datter sijn tweerhande luyde die milde sijn alse vrie luyde ende roekeloese luyde. Die roekeloese luyde dat sijn die gheene die onnottelijck hoere goet over brenghen ende mit onnutten luden verteren. In tavernen. in werscap. in dobbelen in tuyschen in gulsicheit in quaden knechten ende onnutten luden aen te legghen. Ende oec sonder reden tghelt te storten onsinlijc in maniere van berome. ende alsoe ghelt ende goet toe te brengen in dinghen diemen onlanghe ende niet en sal ghedencken. Mer die liberael ende vrij sijn die gheven hoer gelt mildelijck wt in nootlijken saken. In kinderen of maghen te hiliken ghevanghen te verlossen. hoer renten te meerderen. hoer lof te breyden ende armen luden te voeden mit redelyken almoesen nae hoeren vermoghen. Ende hoer vriende truwelyc bij te staen mit ghelde ende mit goede. ende alsoe bescheidelijck daer toe gaen ende mit mate. Dat sijt thore niet onnuttelijc en quisten noch boven hoeren vermoeghen en verteeren.

Coninc phylippus straefde sijnen soen alexander dat hij mit veel te gheven die ridderscap van macedonien aen hem toech. Ende alexander corrumpeerdese allen mit ghiften. menende dat hij dij ghene trouwe wesen souden diemen mit ghelde daer toe brochte. want coninc philippus meynde dat dat gheen miltheit en was mer eene inbrekinghe der minschen. Doen agamemnon ende clytemestra sijn wijf beyde doot waren doe waert horrestes hoerre beyder soen coninc ghecoren in grieken. Ende hij hielt soe groten ende heerlijken hof mit allen den edelen luden vanden rijke dat sij hem ghemeynlijck alte groet lof spraken mer trouwen dat en dede hij alle daghe niet.

Dese sake der miltheit is ten noede of ten orbare ende tusschen dien tween soe is best een redelijc middel ghehouden. Die redene der vrijheit van eynighen luden daer sij mede gheeert sullen werden is tweerhande. Want sij doen den behoeftighen goedertieren hulpe mit gonste ende mit ghelde. Ende die mit gelde ghesciet is lichtelijcker den rijken mer den anderen is enen goeden manne claerre ende loflijker ende van meere werden. Het is beter ende gode bequamer den goeden mildelijck goet te doen dan aventuerlijken luden. doch meyn ic wanneer die aventuerlijke lude goet ende doechdelijck waren dattet dan bet daer aen bestadet waer dan aen anderen bosen armen.

Doe david verdreven was van sijnen soen soe quamen abinmathis ende bersellay in doechdelijker miltheit moet willens. Ende sij gaven david grote hoepen van goude ende provande daer hij sijn volc bij houden soude. Die coninghinne van saba quam wt verren lande ende broecht salomon den coninck overvlodicheit van goude van goede ende van rijcheit.

Soe wie giften gevet die vercrieghet lof ende eer daer bij want hij trect aen hem daer mede die ziele des ghenen diet van hem neempt. Die poeten seggen die heeft te gheven die heeft te regneeren ende die die giften neemet die vercoept sijn vrijheit. Ende raguel die grote rijcheit hadde gaf den jonghen tobie sara sijn doechter te wive. ende gaf hem mit haer die rechte helfte van sijnen goede. Sinter peter seit in sijnre epistolen. Het is saligher te geven dan te neemen Gregorius seit. waer omme soe sydij traech te gheven vanden uwen al daert bestaet is als het doch kenlijc is dat selve dat ghij den armen gheeft die opter erden sit dat gefdij den ghenen die inden

[pagina 85]
[p. 85]

hiemel sit. Men leest vanden edelen keyser tyto. savons als hij slapen ghinck ende hij hem bedacht dat hij dies daghes niemant begaeft en hadde. soe bedroefde hij hem in allen sijnen sinnen. Ic en weet u vander miltheit gheen sonderlinghe exempel meer te scriven. Dan vanden groten alexander die die milste heer was daer men af scrivet. want die ghene die vroem bij hem waren ende die wel deden. dien gaf hij allen bij coninckrijcken bij hertochdommen hij lande ende bij steden. Die goede sinte martijn gaf allet dat hij hadde ende hij liet die wereltlijke heerlicheit die hem van sijnen ouderen ghebuerde. Ende doen hij niet meer te geven en hadde soe gaf hij enen armen minsche die helfte van sijnen mantel. Ende also heeft oec menich heilich man gedaen om die mynne gods te vercrigen ende inder ewicheit daer om behouden blijven.

 
Ic raede u leert dit sermoen.
 
Weest milde ende geft dart is te doen.
 
Dat u god weder gheven moet.
 
Nae deser tijt dat ewighe goet.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken