Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Bouck der bloemen (1904)

Informatie terzijde

  • Verantwoording
  • Inhoudsopgave

Downloads

PDF van tekst (0.93 MB)

XML (0.42 MB)

tekstbestand






Editeur

Stephanus Schoutens



Genre

proza

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Bouck der bloemen

(1904)–Dirc Potter–rechtenstatus Auteursrecht onbekend

Vorige Volgende

Vander xxxiister ende een snoede bloem Quaetheit.

Ter eren vander goedertierenheit daer ic u af ghesproken hebbe so wil. ic u oec segghen die vulheit van eenre onnutter bloemen die hoer rechte dootlijke viant is. ende heit in latijn malicia. dat is te seggen quaetheit of loesheit Al sijnt .ij. name sij beduden eyn sake daer niet goeds af te scrieven en is. Alsoe sinte bernart seit soe en is quaetheit anders niet dan een smake des quaden ende sekerlijc het valt ghemeynlijc Een boes mische die eene ghenoechte of smack inder quaetheit ghescreven hevet. die worter alsoe in ghewortelt dat hij daer mede groyet ende sijn hertte verblijdet hem als in quaet doen mach.

[pagina 97]
[p. 97]

Als nero dede doen hij die stadt van romen sach bernen ende die heilige apostolen dede doeden ende noch menich ander quaet dede ende beval te doen dat alte lanck tot deser tijt te scriven waer. Soe dede herodes die bose creatuere die hem niet en ontsach alle die jonghe kinderkijn te doden totter somme van .cm. ende .xliiijm. Soe was die boese hecuba die doch eens conincks wijf was van troyen. Ende ymmer vroewen toebeheert goedertieren sachtmoedich ende ghenadich te wesen Die hadde acilles gescreven ende dach bescheiden te comen inden tempel tot troyen om mit hem te sluten vanden huwelijck tusschen hem ende pollexina hoer dochter. Al waest dat hij hector hoeren soen doot gheslaghen hadde dat was in eenen bloedigen strijde ghesciet Ende sij hadde hem doch een goet gheleyde toe gheseet want hij nae haer dochter ter eeren stont. Ende hadde hijse ghecreghen troyen hadde staende ghebleven mer die goeden en woudens niet ghehenghen want des volx hadde daer te voel over enen hoop gheweest ende die werelt was luttel besedt. soe waest nutter dat sij ghedeilt worden inder wijder werelt. Als deze achilles quam ende niemant mit hem en bracht dan patroclus den edelen hueschen jonghen man van sconincs bloede. So hadde dese bose coninghinne paris haren soen dar toe ghemaect ende quam heymelijck ende scoten mit enen strale int hole van sijnen voete. daer hij voer appollo hoer afgod knielde nae hoerre ewee ende overvielen hem mit cracht van volke ende sloegense beyde doot boven ghelove ende goet gheleyde.

Die legisten houdent voer alte grote ondoecht ghelove ende voerwaerde te breken die bij ede confirmeert sijn. want is een man die meynedich is niet wt allen ghelove ende ewelijck ghesent. vrijlijken het mach hem een wijle ghelucken mer het sal een quaet ende hebben. Ende wair sij sijn daer en plecht gheen seghe te vallen want sij sijn van goede verwaten ende ghehadt Die ierste meyster van boesheit was die duvel daer alle boesheit ende valscheit wt ghecomen is. Daer om soe moeten die quade scalcke des duvels scoliers wesen want in sijnre scole leestmen vuyle consten. Daer leestmen verraderie loesheit ongerechticheit luxurie sweeren drieghen ontuyheit [l. oncuy(s)heit] lieghen clappinge loegentale ende allen quaden onnutten saken. [Doen die paus gilbertus wt walschen lande gheboren bij orliens den duvel lijf ende siel op gaf om wille te vercrighen. Doe ginc hij tot sijnre scolen ende en dede after dien nye goet. hij waende den duvel te verscalcken mer die duvel was hem te scalck Hij meende sijn siel te behouden alsoe langhe thent hij te jherusalem misse dede ende dat consenteerde hem die duvel dij vol is alre scalcheit ende liste Ende op een tijt gebuerdet den paus dat hij misse doen soude in die capelle daer ic in gheweest hebbe ende is gheheiten jherusalem daer die paus niet op en achte. Hodat daer verghinc mitten paus doen misse wt was dat waer hier alte langhe te scriven oic en roertet onser materien niet dan die scalcheit van den duvel daer ic voer af sprack.]

Die bose lude die gheloeft sijn bijden heren dat sijn grotte potte vol venijns. want sij vergeven den heer mit quaden rade. ende venijnen alle goede saken mit oeffeninghe der quatheit ende mit voersettinghe der ongherechticheit. Eyn quaet minsche die macht hevet dat is een duvel inder werelt. want hij en ontsiet hem niet ende wort verhardet inder quatheit. als pharao coninc van egipten dede die den volck van israel also vele verdriets dede. [Oic mede die bose coninghinne iocta die te parijs in soe grater oncuysheit leefde daer ic voer af ghescreven hebbe int capittel vander luxurien. Ten was hoer niet ghenoech dat sijse alle doode ende inder seyne dede verdrencken als sijse tot haren vuylen wille ghebesicht hadde. mer die laeste clerck die bij hoer was hadde vast vernomen dat sij niet weder en quamen ende dacht hoe dat wesen moecht. Soe dat hij eenen heymelijken vrint op hem dede wachten mit een bootkijn dien vissche ende hij behielt also sijn lijf Doe cochte hij vele voghelkijn ende bant elc aen sijn been een ceelkijn daer instont ghescreven dat die coninghinne sulken wijf was. Doen wert sij soe boes ende verwoet in quaetheiden dat sij op een tijt alle die clercken vander universiteit ten eten hadde op een scoen velt buten parijs. Daer hadde sij mordadige lude toe ghemaect dij om ghinghen ende namen elcken sijn mes wantse coninghinne sien woude ende doen sloghen sij allen die clercken ghelijck doot.]

Bijder quaetheit machmen ghelijken den wessel dat een cleyn dier is mer het is soe viantlijc ende soe scerp inder quaetheit dattet gheen venijn noch ander dier ontsiet soe haert is in sijnre quaetheit. Die quaede en meent niet dat yemant goet is ende siet hij doecht van eenen anderen hij sallen berespen om sijn doecht te vermynderen. alsoe hij den goeden altoes hatet ende dat is een prove des goeden levens. want wanneer du den bosen beghinst te behaghen soe meshaechstu gode. Ende alstu den bosen meshaghes soe moechstu weten dattu doecht beghinst te vercrighen. Die ghene die dij goede berespen of bespotten dat sijn rechte viande gods. die den

[pagina 98]
[p. 98]

anderen doechdelijken wil berespen oft vermanen die salt hem openbaer segghen ende en sal hem achter sijnen rugghe niet becallen.

 
Van quaetheit seg ic u niet meer.
 
Wacht u daer voer dat is mijn leer.
 
Blijfdij in quaeden boesen leven.
 
Dat valsche venijn wort u ghegeven.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken