Skiplinks

  • Tekst
  • Verantwoording en downloads
  • Doorverwijzing en noten
DBNL - Digitale Bibliotheek voor de Nederlandse Letteren
DBNL - Digitale Bibliotheek voor de Nederlandse Letteren

Hoofdmenu

  • Literatuur & Taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw

meer over deze tekst

Informatie terzijde

Fabryk
Toon afbeeldingen van Fabrykzoom

  • Verantwoording
  • Inhoudsopgave

Downloads

XML (0,30 MB)

tekstbestand






Genre

proza

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Fabryk

(1995)–Trinus Riemersma–rechtenstatus Auteursrechtelijk beschermd

Vorige Volgende
[pagina 143]
[p. 143]

Das musß ein Stück vom Himmel sein

In moaie troep is it. Stront en jiske, dêr sit ik no yn. Ik moat de húsketontsjes skjinspuitsje en de papierrotsoai ferbaarne. Alle dagen bin ik hjir, fan sân oant fiif. En altyd allinne, op in pear kear nei, as se de jiskeauto hjir leegje of de tontsjewein. Dêr bin 'k ek neat net rouwich om, ik kin my skoan allinne rêde, ik haw gjin ferlet fan oanspraak. Ik doch dit ek folle leaver as by de doarren lâns mei de tontsjekroade en hieltyd dat geseur fan de minsken. Ik haw it hjir rêstich, nimmen mei hjir komme, en as de smoarchjonges hjir al omstrune, jei ik se wer oer 't stikeltried. Ik bin hjir baas, moarns doch ik it sket iepen en jûns wer ticht, en de kaai nim ik mei nei hûs. Foardat ik der moarns bin, kinne se neat begjinne. Dit is mines, allegear. De kaaien fan de wetterlieding haw ik ek, en fan it hokje dêr't de peteroalje yn stiet en myn ark. Dêr stiet myn fyts ek altyd en dêr yt ik middeis, as it waar my te min is om nei hûs te fytsen, en dat is faak sa.

Ik haw it hjir bêst nei 't sin, al wie dat oare dan in fabryk en is dit mar in skytfabryk. Ik bin bliid dat ik derwei bin. Ik haw doe by mysels sein, dit moat ophâlde, ik frek it langer, en ik ha der net wer west. Nee no, jo moatte witte wat jo wolle, as jo jo nocht ha, dan moatte jo de boel delsmite. 'k Haw ek gjin ûntslach frege, ik sei tsjin Syts, se sjogge wol dat ik net mear kom en fierder moatte se har de kont der mar mei rêde. 'k Haw earst in fjirtjin dagen fakânsje holden en doe ha 'k dit baantsje krigen by de gemeentereiniging. Eh no, 't wie moai waar, en wat sille jo altyd bebealgje, ik sei tsjin Syts: ‘Do kinst my mear fertelle, ik nim it der in pear wike fan, dy pear sinten gean dochs op.’

Yn Ljouwert ha 'k Bouma nochris troffen, mar ik ha him neat oan 'e noas hongen. Hy frege wat ik no soe, mar

[pagina 144]
[p. 144]

ik sei, mar stil ôfwachtsje. Gjin panyk. 'k Wie doe nei in dokter ta. Ja, dat wienen Syts har útfynsels. Ik sei, healwize oanslaggen allegear, mar dat soe dan sa goed wêze. No, ik tocht, ik fermeitsje my wol, en se moat mar ôfwachtsje wannear't ik wer thúskom.

Ik wit net wat Syts mankearde, dy is dy moandeitemoarns fuort al om dokter flein. Ik tocht, wat der no stikken is, mar nee, it wie om my begûn! No, dat soe heve! Ik sei tsjin dy kearel, dat ien fan ús beiden de kolder yn 'e kop hat is bêst mooglik, mar ik leau net dat ik dat bin. Ah, jo moatte sokke lju stean, oars geane se mei hoazzen en skuon oer jo hinne. Ik moast mar in skoftsje thúsbliuwe, tocht him. No, ik sei, dan gean ús klokken aardich lyk, dat wie 'k sels ek al fan doel. Doe hat er Syts wiismakke dat ik nei Ljouwert moast, no hawar, ik koe dat gesanger ek net oan 'e kop ferneare, dat ik ha nei dy fint ta west. No, ik sei dy jûns tsjin Syts, no ha 'k by de grutste idioat fan Ljouwert west. Wat dy kearel net frege! Oft ik in soad fan ús mem holden hie, oft wy it faak dienen, oft ik wolris nuvere dingen seach, dy't der net wienen. Ik ha mar wat ja en nee sein, wat hie hy dermei te meitsjen. Hy hie ek mei de sjef praat, sei er, en dy wie wol oer my te sprekken. Moast der ek noch bykomme, 'k ha in pear goeie hannen oan 't liif. Doe frege er oft it wurk my net foldie en wêrom net. Oft ik miskien graach hegerop woe, ploechbaas of sa? De sjef hie sein dat dêr miskien wol wat op te finen wie. Wat ik derfan tocht? Mar 'k ha mar wat grânzge, 'k woe my foar dy fint net útklaaie. Ik like him oars wol in flinke kearel ta, sei er, hy tocht seker dat ik wiis wie mei sa'n komplimintsje. Dat ik mear yn 'e bouten hie as him, wist ik wol.

'k Hie dochs wat happiger wêze moatten, dan hie ik him miskien útkloarkje kinnen oer wat de sjef sein hie oer dat ploechbaas wêzen. Fansels hie 'k it net oannommen,

[pagina 145]
[p. 145]

ik ha neat gjin ferlet fan sokke baantsjes. No't ik net woe, sille se wol ien of oare suffert ploechbaas makke ha, se kinne sûnder my neat begjinne, se woenen wol graach dat ik werom kaam, mar 'k sil wol útsjen. Ik kin wurk krije oan alle kanten, mar ik ha 't hjir skoan, ik bliuw hjir mar stikem wat.

Se ha niis in weinfol tontsjes lege en binne mei nije wer ôfset. 'k Moat aansent oan it skjinspuitsjen, mar it stjonkt der no as in kring, dat ik wachtsje mar even, it spul moat earst wat bekomme. 't Is al wer in hiel skoft lyn dat der in pream mei stront fuortgien is, dat de troep leit no hast oan it dak ta. Wol oardel meter leit der. 't Liket wol oft de lju oars net dogge as op 't húske sitte.

Dat produsearje minsken: stront en jiske. Se kinne bôle ite of ierappels of koeke of patates frites, stront wurdt it allegear. Tontsjes en tontsjes fol, fersierd mei stikjes papier en fan en ta in damesferbantsje. De produkten fan de geast lizze fierderop: âld papier, kranten, skriften, boeken, minnebrieven. Ik snip der wat peteroalje oerhinne en stek de brân deryn: jiske.

Lit se mar frette en sûpe, by my komt it allegear telâne. O, ik laitsje om de grutte mynhear dy't him yn it hotel te barsten fret en om de nuffige famkes mei har kroket út de automaat. Ik sjoch dwars troch har moaie klean en har oppoetste hûd hinne dat se fanbinnen fol stront sitte. Moarn ride se de bringst hjir wer hinne, en de dames en hearen dogge mar krekt of witte se fan de prins gjin kwea.

Lit se mar grouwe boeken skriuwe mei wit ik wat foar wysheden, en lit se mar kranten printsje. Ik sis neat, ik doch oars net as wachtsje. De kranten haw ik in dei letter al en de boeken, dat mei in jier of tsien duorje, mar dan komme se ek, stikken en út de bân. Ik waarmje myn hannen derby en ik gniis om de dwazen dy't har derfoar ynspand hawwe.

[pagina 146]
[p. 146]

Hjir rint de mienskip op 'e non: stront en jiske. Lit de dames en hearen de noas mar oplûke foar de dwinger, ik laitsje om harren. Alles wat oerbliuwt fan dreamen en winsken leit hjir op in bult. Ik laitsje om't nimmen my mear wat wiismeitsje kin. Goed of kwea, moai of mâl, hjir bedarret it, en as it fjoer deroer gien is, is it ien grize massa. Ik sjoch troch elke moaiskyn hinne, ik wit wêr't alles hinnegean sil, sels foar't it noch bestiet.

Soms klim ik op it dak boppe de strontkolk en sjoch it hear oer. O, dan fiel ik my ryk! Under my leit al mear as oardel meter en om my hinne waakse de bulten jiske heech as tuorren. Lokkich bin ik, lokkiger as ea, in kening bin ik yn myn eigen ryk en nimmen dy't my wat makket. Ik stean op it dak en fiel my sa grutsk. Der is noch ien ding dat ik graach woe en dan soe myn lok folmakke wêze, dat ik sa'n ferdomd eigenwiis preuts snotfanke fan in jier of achttjin by de kladden krije koe om har op 'e harsens yn 'e stront te triuwen. Mar myn dei komt wol en ik sil wachtsje. Ikke! Ikke, de God fan Stront en Jiske.

 

Loaiïngea, 26 maaie-25 desimber 1963.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Algemene gebruikersvoorwaarden
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken