Rethoricale wercken
(1562)–Anthonis de Roovere–
AuteursrechtvrijHeere Godt waer salmen kiesen betrauteHEere Godt waer salmen kiesen betraute
Dat soudick al te gheerne weten
Daermen meest hoopt, staetmen meest faulte
Want in een flaute
Dunckt my noyaelheyt al verbeten
Tvolck heeft zijn schaemschoens meest versleten
Sweren en lieghen, dats nv al dliedt
Oock derf ick my claerlijck wel vermeten
De menighe spreeckt hy en meenes niet.
Men vindt veel lieden soe schoon van woorden
Daghelijcx teghens den anderen spreken
Met allen soe vriendelijck van accoorden
Waert dattet hoorden
Andre, haer herte soude onsteken
| |
[Folio 24v]
| |
Het schijndt eer sy hem lieten ghebreken
Sy doochden selue lieuer verdriet
Maer sal recht vonnisse zijn ghestreken
De menighe spreeckt hy en meenes niet.
Och Heere, oft voor elcx voorhooft stonde
De loosheyt die elck binnen heeft
Het soude de menighe met vollen monde
Wt ionsten gronde
Lachen, die noch in sorghen leeft
De menighe schoone woorden gheeft
Van binnen, die buyten om loosheydt spiet
Wee hem, daer sulck ghebreck aen cleeft
De menighe spreeckt hy en meenes niet.
Suclk seydt met woorden dit ende dat
Ghebiedt, ghy muecht in my verweruen
Maer dies te doene eens heeft ghehadt
Die weetet plat
Sy en gauen hem niet een stroo op steruen
Ick wilde wel, men sulck mocht scheruen
Sonder sonde, alsoomen wermoes pliet
Nochtans al soudmer omme bederuen
De menighe spreeckt hy en meenes niet
Louetuyters spreken vele sonder meenen
Alle die veel clappen zijn loghenaers
Mans die veel grijnen, wijfs die veel weenen
Ghelooft niet eenen
Want tis al volcxken van eens tsiaers
Dieder minst toe seydt die is de baers
Die ghetroust is, wanneer vriendt noodt gheschiet
| |
[Folio 25r]
| |
Proeft sonder noodt, want trouwe is schaers
De menighe spreeckt hy en meenes niet
Prinche.
Alle die schoone voor de ooghen spreken
Ghelooft niet voordere dan ghijse siet
Jnt schoone samblandt, zijn veel ghebreken
De menighe spreeckt hy en meenes niet.
|
|