Rethoricale wercken

Refereyn.

ALle dinck en is maer een ghewuente
Ghewuente doet veel dincx zijn te binnen
Maer gewuente, coemt niet altoos te puente
Al wil elck zijn ghewuente beghinnen
Ghewuente die maeckt wel abel sinnen
Jae daer tbegrijp, naer aert wil vlieghen
Sulck streckt om clappen al zijn vinnen
Maer die veel clapt, die moet veel lieghen.

Een wandelaer die in pelgrimagie gaet
Hoe verder bewandelt, hoe bat beweecht
Wat mensche die nae sciencie staet
Ghewuente van als gheuroeden seeght
Wel te spreken, niet al te qualick en leeght

[fol. 30v]

 

Maer men mach wel tkindt te veel wieghen

 

Tis een oudt woordt datmen tsegghene pleeght

 

Maer die veel clapt die moet veel lieghen.

 

 

 

Die vele clapt, clapt dickwils tontije

 

Ten zijn oeck al Euangelien niet

 

Alsucke clappaerts stel ick bezije

 

En achte haer woordt, oft wint als riet

 

Veel claps al niet dan lueghenen bediet

 

Haer schoone woorden meynen al bedrieghen

 

Hier prijsen, daer blameren, dats haer liedt

 

Dus die veel clapt, moet veel lieghen.

 

 

 

Clappaerts die moeten luyde oft stille

 

Quaet clappen, al soudt haer selfs quaet wesen

 

Thooft leggense op schoudere, laet clappen dat wille

 

Bol wt bol in, van dien van desen

 

Ghewuente is iuyste in sulck gheresen

 

Rechts soe opt vleesch hen voeghen de vlieghen

 

Dus blijf ick by dwoordt als eerst ghelesen

 

Soe wie veel clapt, die moet veel lieghen.

 

 

 

Prinche alst al gheseydt ende al ghesonghen is

 

Qualijck gheschepen, doet qualijck drieghen

 

Niet datter yemant toe bedwonghen is

 

Maer die veel clapt, die moet veel lieghen.