Rethoricale wercken (1562)

Rethoricale wercken

(1562)–Anthonis de Roovere– rechtenstatus

Auteursrechtvrij

Vorige Volgende


Van quade tonghen. O Schieloose Tonghe, smettelijck ledt Wiens woorden scherper dan sweerden snijden Die soe menich edelen sin besmet Met dijnen fenijne, ende brenght in lijden Trecht Gots al u vermalendijden Ghy besmet, men cant af wasschen nauwe Nochtans die wel bemerckt dijn strijden Ghy doet v seluen de meeste rauwe. O Sweerdt aen beyde zijden ghewet Dat met eenen slaghe hem drie vermoort Eerst coempt ghy selue in tsteruens net En van wien ghy clapt, die doodt ghy voort Ghy doodt oock mede diet van v hoordt Want ghy zaeyt nijdt, daer eerst was trouwe Dus claer, diet wel ten gronde spoort Ghy doet v seluen de meeste rouwe. Ende daer op neem ick mijn vermet By schriftueren diet doet verstaen Jnt ledt, daer du braeckst Gods wet Daer sulstu dijne pijne ontfaen O nijdighe Tonghe hoe salt dan ghaen Met v, die doodt man ende vrouwe Dijn pijne wordt eewich sonder waen Ghy doet v seluen de meeste rouwe.
[Folio 65r]
Al wordt yemandt ghedaelt of neder ghesedt Ontschuldich wt eeren by dijnen dade De goedtheyt Gods, helpt hem te bet Ende selue ghebuert v schande en schade Wee hem die lecht den steen van tquade Daer andere by vallen in tsdrucx ghetrouwe Godt salt v heysschen, och wat te rade Ghy doet v seluen de meeste rouwe. Waer was een nijdich, oydt deghelijck vet Waer was een nijdich schoon van coluere Waer was een nijdich oydt sonder dobblet Waer was een nijdich goedt van natuere Waer was een nijdich oydt sonder ghetruere Wae was hy, waer is hy, daermen peys schouwe Nieuwers, dies segh ick ter felder figuere Ghy doet v seluen de meeste rouwe. O vredighe hertkens fijn als Aghet Doet wel, en acht gheen quade tonghen Schoudt die daedt, der blaemten trompet Der lueghenen, wordt goedt raedt ghesonghen Hy verdient vele die staet bedwonghen Sprayet hy hem met Patientien dauwe Clapt clappaerts vry, ick bens ontspronghen Ghy doet u seluen de meeste rauwe.

Vorige Volgende