Rethoricale wercken

(1562)–Anthonis de Roovere– rechtenstatus



[Folio 67v]
Nieuwe Jaer van Brugghe
het welcke Anthonis de Roouere maeckte int Jaer veerthien hondert ende tachtentich, twee Jaren voor zijn overlijden, want sesthien in Meye .M.CCCC.LXXXJJ. daer naer overleedt hy. Ende is tnaeruolghende gheschreuen wt zijn eyghen handtgheschrifte, by my al noch in wesene zijnde, ende wel punctueerlick gheschreuen. VVant alle mijn sinnen zijn gheneghen Om te weten goede eersame dinghen Dies ghinck ick wandelen nae mijn pleghen Om sien wat soude tgepeys in bringhen Maer Kennisse mijn sustere en woudts gehinghen, Sy sprack, ghy moet my met u draghen Jck moest doen, dies wy te samen ghinghen Want men sal kennisse niet veriaghen. Aldus soe droech ick kennisse met my Tot wy op een loopende waterken quamen Daer stonden vele soete cruydekens by Dies wy aldaer reposeren namen Wy waren daer vry ende sonder beschamen Dies seyde ick wel lieue suster // mijn Een luttel slapens moet my betamen Mijn herte sal vele te gheruster // zijn. Sy consenteerdet ende ik wordt slapende Sy wieck, want kennisse houdt maniere Ende daer wordt my een droom betrapende
[Folio 68r]
Seer wonderlijck, ende van vreemden bestiere My dochte ick ligghende op die reuiere Dat ick een Eester rechts teghen my sach Seere rijckelijck ende van waerden diere Maer het scheen dattet al veruallen lach. Want de Gaelerijen, de Heckens, de Glenden De Alleyen, de Thuynen, de haghen van roosen De baelgien, sitsteden, dlach al in allenden Niemandt scheen op dat Eester gloosen Fonteynkens, speykens, tlach al vol noosen Waterloopkens, walgrachtkens ende al Wijngaerdekens, vruchtkens, het sal by poosen Versluysen, bederuen, groot ende smal. Dit siende in mijnen visioene Doen sach ick daer commen een vrouwe gaende Rechts weselijck, maer in aermen doene Als die niet langher leuen waende Een beddeken hadde sy by haer staende Daer viel sy op by nae half doodt Maer de droefheyt die sy daer vermaende En hebben in claghene gheen ghenoodt. Sy sprack my en mach gheen hope baten Mijn sieckte is claerlijck incurabele Want van alle vrienden ben ick ghelaten Dat siluer wit was, is swert als sabele Om steruen ben ick met allen abele Jck en dooghe tot gheenen anderen dinghen Adieu Maechschepe, adieu Notable Fortune wilt my te nieten bringhen.
[Folio 68v]
Want ick sie dat mijn Eestre schoone Dat wijlen soe wel was gherepareert Als alder blijdst van onder den troone Leydt onder de voeten nv gheblameert Dies dlijden soe seere my persequeert Dat een Apostuemie mijn herte begroeyt Dus moet ick steruen cort ghenoteert Want passie te seer my overvloeyt. Jck en derf nieuwers thooft wt steken Want alle de wereldt ben ick schuldich Gheloofsaemicheydt moet my ghebreken Dies macht hebben, en zijn my niet ghehuldich Het rochelen der verckenen menichfuldich Doen mijnen Eestere verdriet en schade Dies moet ick steruen onuerduldich Ten voorsiet die lieue Gods ghenade. Nae dese clachte die sy daer dede Sach ick drie Vrouwen commen by haer Troostende met sulcker toeuelickhede Al hadt moeder ende suster gheweest voorwaer Sy toochden hen soe gheionstich daer Elck van hen drijen maeckte hem de naeste Al was de sieckheydt noch soe swaer Sy vielen huer by met grooter haeste. Deerste brochte edelijck spijze ende dranck Dander die seyde haer minnelijcke tale Die derde brochte chierheyt sonder lanck Wtnemende schoone by speciale Sy spraken hebt hope in uwer quale
[Folio 69r]
Roept op de gratie van onsen Heere Al wil v siecte nv worpen te dale Godt en laet zijn vrienden nemmermeere. Desen soeten troost aldus bewijsende Die niemandt op aerden mach zijn vernoeyende Quam de sonne daer wt den hemel rijsende Schoonder dan ickse noydt sach gloeyende Ende wt haer quamen ses raeyen vloeyende Die op tselue Eestere dalende torden Ende ick om sien my daer toe moeyende Soe waren dye Raeyen ses menschen worden. Dit dochte my wondere aldus int schijnen Dat Raeyen in menschen souden verkeeren Jae sy vertoochden hen als Medecijnen Ghestapelt, ghesedich, als mannen van eeren Sy wilden dEestre in duechden vermeeren Ende der siecker vrouwen doen rijsen wt drucke Diet sach mochte daer compassie leeren Het quam den Eestre ten grooten ghelucke. Daer ghinghen sy alle sesse ghesinlijck Nae dat sy tstuck gheschepen saghen Troostende der siecker vrouwen minlijck Als Noodtvrienden helpende dlijden draghen Op heffende, Thuynen, Glenden, Haghen Voetpaden, Beecxkens, elck als een meestere Om weldoen, ende omme solaes beiaghen Der Vrouwe, ende haer veruallen Eestere. De groote hertelijckheyt die ick daer sach
[Folio 69v]
Die en mach ick nemmermeer vergheten Doen ghaf my Kennisse daer eenen slach Standt op, laet my dijn schouwen weten Doen seyde ickt haer groot ende smal ghemeten Wes ick ghehoordt hadde ende ghesien Vander sonne ende raeyen, en tEester versleten En de clachte der vrouwen, ende al tgheschien. Doen seyde tot my mijn suster Kennisse Ontdoet v ooren, vaet mijn vermaen Het Eestere dat ghy saecht lijden schennisse Daer machmen der stede van Brugghe verstaen Ende de Vrouwe met sware sieckten beuaen Js dinwoonende volck, iae goet van gronde Die langhen tijdt hebben haer clachte ghedaen Om remedie van huere onghesonde. Ghy saecht daer commen oock drie vrouwen Dye der siecke deden hantierenisse Ende en waren die vrouwen (hebt dies betrouwen) Brugghe waer doodt, om zijne regierenisse Deene heet Aelmossene, dandere Kercken verchiernisse De derde is Goddelijcken dienst ghenaempt Die houden Brugghe sonder schoffiernisse Met deuotie die daer den cost toe raemt. De ses raeyen die hem ghehelpich bieden Sijnder toe ghebeden wt charitaten Sy moghen die ses Ghecomitteerde bedieden Die Poorten, Mueren voorsien, en straten Brugghen, Caeyen, commende ter baten Daer menich mensche aen wint zijn broodt
[Folio 70r]
Oock schulden betalende diuerssche staten Godt stae hem by in alder noodt. Wel heeten sy Raeyen des hemels ghedaelt Van Godt als sonne hier neder ghesendt Die op heffen dat deerlijck lach ghefaelt By daghe by nachte, dies diligent Op trepareren dijne ooghen went Ghy saecht hoet Eestre lach vergleden Ben ick als Kennisse met dy bekent Ontsluydt dijn mondt met bedanckelickheden. Doe seydick kennisse gheminde iuecht Wel hen die v te draghene pooghen Vele meer dan ghy my segghen muecht Sie ic baerblijckelick voor mijnen ooghen Men machse by comparatien tooghen Bijden eerbare vroede van Athenen By wyens regimente moeste verdrooghen Alle der Griecken claghen ende stenen. Ende ick hope de sonne sal soe draeyen Want wy zijns hoochelijck worden gheware Dies wensch ick desen edelen Raeyen Weluaren tot hueren nieuwen Jaere Jn danck nemende dat ick verclare Want den aerbeydt quam wt ionstighen sinne V allen beware // vry los van vare Maria die opperste Coninghinne.

Vorige Volgende

Nieuwe Jaer van Brugghe