Rethoricale wercken

Refereyn, daer mede Anthonis de Roouere tzijnen .xvij. Jaeren Prinche wert van Rethorijcke.

MEn vindt moeders die haer vruchten verslaen
Men vint moeders dier haer kinderen ontlijuen
Men vint moederen die haer vruchten ontgaen.
Men vint moederen diese den vader ontkijuen
De sulcke latense vondelinghen blijuen
Men vint moederen die haer kinderen verhueren
Sulck doet de kinderen luttel beclijuen
Daer Trouwandijse af ghaf dbecueren
Men vindtse die tskindts veruaren trueren

[fol. 84r]

 

Men vindtse die quaet raden nacht ende dach

 

Men vindt moederen die haer kinderen sueren

 

Maer om desen aerbeydt soe is tghevrach

 

Of Moederlijck herte lieghen mach.

 

 

 

Want voorwaer door goedt noch smerten

 

Doen zijdt, Godt is hen schuldich weeninghe

 

Tzijn moeders, maer gheen moederlijcke herten

 

En hebben sy, maer zijn van valsscher meeninghe

 

Sy doen natuere groote vercleeninghe

 

Want tbloedt cruypt daert niet gaen en can.

 

Haer leuen, haer wesen, haer corte teeninghe

 

Js beestelijck, menschelijck nv voortan

 

Haer herten noydt moederlijckheyt verwan

 

Maer zijn Manachtich sonder verdrach

 

Moeder niet, moederlicx tsduuels ghespan

 

Behoorende al int aerdtsche beiach

 

Want Moederlijck herte niet lieghen en mach.

 

 

 

Dmoederlijck herte is soe ghetrouwich

 

Tware lieuer vele, dant kindt onteerdt

 

Besietet ghemeyne wijueken rouwich

 

Alsoe ons Salomons vonnisse leert

 

Noydt moederlijck herte, en was ghekeert

 

Haer kint te latene, ende dat volbrenghende

 

Wordter onvoorsien wat drucx vermeert

 

Moederlijcke minne ist al bedwinghende

 

Natuere, en wils niet van ghehinghende

 

Dat bloedt van bloede, soude doen gheclach

 

Vleesch van vleesche, ontrouwe minghende

 

Ten mach niet wesen siet, doet ghewach

 

Dat Moederlijck herte niet lieghen en mach.

 

 

[fol. 84v]

 

¶ Prinche.

 

Neempt dit slecht dicht in dancke

 

Ter eeren der edelder Rethorijcke

 

Al vallet tgheselschap nv opt crancke

 

En slaet ghy ommer de const gheen swijcke

 

De sulcke hanthieren andere practijcke

 

Sy en connen de schade noch schande af wasschen

 

Maer doet ghi, dat vruecht wt dy blijcke

 

Oft anders soe worp ick mijn brieuen in dasschen.