Rethoricale wercken (1562)

Rethoricale wercken

(1562)–Anthonis de Roovere– rechtenstatus

Auteursrechtvrij

Vorige Volgende


Refereyn. OCh Godt // wat lot // is my gheuallen Dat ick // een stick // dus moet met allen Deruen die ick oydt liefst aensach By haer // voorwaer // gheerne waer ick minlick Mijn herte // lijdt smerte // seere inlick Ende langhe sal sonder verdrach
[Folio 88r]
Ten betert Godt, diet al vermach. Al tooghen // mijn ooghen // blijden schijn Mijn sinnen // ghewinnen // al lijdens pijn Wt swaer verlanghen, dits mijn gheclach Haer deruen // doet steruen // sonder wonde Hoe soudick // al woudick // teenigher stonde Laten haers te doene ghewach Ten betert Godt, diet al vermach. Och scheyden // met leyden // bedenck ick dy Soe langher // soe strangher // valts du my Dit dunckt my zijnde een hert ghelach Waer by // heeft sy // my dus ghelaten En can // aerm man // in gheender maten Ghemercken, wat doet op eenen dach Ten betert Godt diet al vermach. Princhelijck Vrouken // mijn trouken // ach Plaecht // onversaecht // mijn eyghen tzijne Sonder trueren // veel vren // hadden vrolic beiach Maer ioleerden // bancketeerden // te biere te wijne Hoet nv coempt, ware verloren pijne Huer daer af te doene eenich gheurach Want anders, en wordet te gheenen fijne Ten betert Godt diet al vermach.

Vorige Volgende