Rethoricale wercken

(1562)–Anthonis de Roovere– rechtenstatus


Gheestelijcke spieghelinghe. EEn die hem seluen niet en siet Js blinder dan men ghesegghen can Maer twas een meester my en twijfels niet Die eerste des spieghels conste ghewan Hy is proffijtelijck wijf ende man Tverborghen tooghende int openbare Dus wil ic v spiegelen schencken dan Jonstelijck teenen nieuwen Jaere My duncke oock wel dat orboor waere Dat elck hier toe wilde diligent // zijn Jn dancke ontfaende met blijder mare Ghemerckt dat spieghelen excellent // zijn Die hem best spieghelt sal netst bekent // zijn. In ons beuoelen is cleyne certeynicheyt Dat doet onser broosheyt heerschappye Dus siet den spieghel aen der reynicheyt Twelck is de weerdighe maecht Marie Voor wiens glas de hoochste melodye Haer seluen heeft ghetoocht soe crachtelijck Soe dat de menschelijcke baelgie Door haer reyn glas, crijcht licht waaerachtelijck Schouwende claer, dwelck hy voordachtelijck Aen nam in haer reyn maechdelijck ghewin Als spieghel bouen allen drachtelijck
[Folio 90v]
Wildt hier in spieghelen wat muechdy min Wel spieghelen brengt peys ende wijsheydt in. Ter waerachticheyt spieghele claer Twelck elck gherechtich mensche sy Wiens woordt ende werck is duecht eenpaer Daer sullen ons seluen in spieghelen wy Want elck rechtaerdich mensche vry Die is een spieghele vol van lichte Daer elck hem seluen mach spieghelen by Soomen in spieghelen claert tghesichte Hy spieghelt hem saechte, cleyn is tghewichte Dit spieghelt by andre die hem ontrent zijn Aenueerdt altijdts tgoede, laet varen tslichte Ende laet waerachtich v fundament // zijn Die hem best spieghelt zal netst bekent // zijn. Dan isser den spieghel van Charitaten Twelck is des menschen vriendt in trouwen Want een vriendt ghetrouwe is bouen maten Eene spieghele zijn vriendt om schouwen Die dlicht zijnder duecht in vriendts benauwen Eenpaerlijck sturt ende dalen // doet Dat is een spieghelijck bedauwen Daer alle druck by falen // moet Gheen rijckdom en mach betalen tgoedt Van desen spieghele nae recht bekin Tverbeelde is schoone de stralen zoet Wel hem wiens ooghe schoudt sulck ghewin Wel spieghelen brengt peys ende wijsheyt in. Noch eenen spieghele vol Jubilatien
[Folio 91r]
Hebben wy binnen desen aertschen ghetruere Twelck is den soeten spieghele van gratien Ghenaempt die heylighe weerde schriftuere Jn wiens glas, wy sien talder vre Al dat ons salich is ende noodt Den oorboor van Gods gheboden puere De noodtsaecken der Sacramenten bloodt De waerachticheyt vanden aertijckelen groot De ghebreken daer wy inne beglent // zijn De swaerhede vander eewigher doodt Als loon, voor die van duechden ghespent // zijn Die hem best spieghelt sal netst bekent // zijn. Als alle dese spieghelen wel besien // zijn Ende de handt te wercke gheleedt Soe salder een spieghele noch bouen dyen // zijn Twelck den spieghel der glorien heet Ende dese spieghele soe elck wel weet Dat is Godt selue die eewich leeft Jn wiens glorieuse spieghele breedt Elck mensche zijns beelden wesen heeft Welck beelde, Gods beelde soot redene gheeft Schouwen sal nae ons doodts beghin Sien teghens sien, daer niemant beeft Maer al vol glorien, gheeft hier toe sin Wel spieghelen brengt peys ende wijsheyt in. Spieghelt v dan aen anders weldaet Spieghelt v aen Gods vrienden verheuen Spieghelt v aen de wereldt die fel staet Spieghelt v aen het onseker leuen Spieghelt v slijm der aerden beseuen
[Folio 91v]
Spieghelt v in Gods oordeel stranck Spieghelt v aen der helsche beuen Spieghelt v tis hier tzijne onlanck Spieghelt v sondelijcken ontfanck Spieghelt v aen die aermen die pacient zijn Spieghelt v aen Gode ghy lichaemen cranck Daer de vijf wonden inne gheprent zijn Die hem best spieghelt sal netst bekent // zijn. Daer dat hem elckerlijck tooghen // sal Jae moeten tooghen ter laetster tijdt Soe bid ic v hebt voor ooghen // al Dat ghy spieghelijck ghereynicht zijdt Dat hemele claerlijck wordt verblijdt Jn hem, die net ghespieghelt zijn Siet toe, dat v gheen vruecht ontglijdt Om dat mijn sinnen ontbeghelt zijn Godt kentse wel, die ghereghelt // zijn Daer mede sluydt ick mijn grof ghespin Maria doe v beseghelt // zijn Daer bouen bijden Ceraph ende Cerubin Daer ouervloeyende peys is in.

Vorige Volgende

Gheestelijcke spieghelinghe.