Verscheyden litanien tot ghebruyck des catholijcken leghers

[p. 147]

Den Reys-wech.

Alsmen wilt gaen reysen, soo salmen dit lesen nae de menichte der persoonen. Want voor een alleen leeftmen anders dan daer der veel zijn, het welck wy root afgheteeckent hebben.

Antiphona. Inden wech des vreden.

Canticum Benedictus Dominus Deus Israel. dat is: Ghebenedijt zy de Heere, &c.

Int eynde. Eere sy den Vader, ende den Sone etc. daer nae herhaeltmen de Antiph. Inden wech des vreden ende voorspoets stiert my [ons] almachtich ende bermhertich Godt: ende de Archangel Raphael wilt my [ons] gheselschap houden op den wech, op da tick wederom come [wt wederomme comen] tot ons eyghen plaetse.

Kyrie eleison. Christe eleison. Kyrie eleison. Vader onse. secretelick.

℣. En leyt ons niet in becoringhen.
℞. Maer verlost ons vanden quade.
℣. Maect gesont uwen knecht [knechten.]
℞ My [ons] Godt die in v hopende is [zijn] ℣. Seynt my [ons] helpe, o Heere, van de heylighe plaetse. ℞. Ende beschermt my [ons] van Syon.
℣. Weest my [ons] Heere een torre der sterckheyt. ℞. Van des vyandts aensicht.
℣. En laet den vyandt gheen voorspoet teghens my [teghens ons] hebben.
℞. Noch dat de sone der boosheyt iet daer toe doe, om my [ons] te hinderen.

[p. 148]

 

℣. Ghebenedijdt zy de Heere tot allen daghen. ℞. Een voorspoedighe reyse sal by my [ons] maken, Godt die ons saligh maeckt.

 

℣. Thoont my [ons] Heere uwe wegen.

 

℞. Ende leert my [ons] v paden.

 

℣. Och oft mijn [onse] weghen gheschickt worden. ℞. Om te onderhouden v rechtuerdigh-makinghe.

 

℣. Die cromme wegen sullen recht wesen.

 

℞. Ende die scherpe plaetsen tot effen wegen.

 

℣. Synen Engelen heeft hy van v beuolen.

 

℞. Dat sy v bewaren souden in allen uwen weghen.

 

℣. Heere verhoort mijn [ons] ghebedt.

 

℞. Ende mijnen [onsen] roep come tot v.

 

℣. Die Heere sy met my [ons, v lieden.]

 

℞. Ende niet mijnen [onsen] gheest.

Oremus.

Godt, die de kinderen van Israel deur het middel van de Zee met drooghe voetstappen hebt den wech doen nemen; ende die oock hebt de drie Coningen den wech tot v toe, door het wijsen der sterre gheopent; ick bidde v [wy bidden v] verleent my [ons] een gheluckighe reyse, eenen vreedtsamighen tijt: op dat ick [wy] uwen Engel altijts mijn [onsen] wech-ghesel zijnde, tot die plaetse daer ick [wy] nae trecken, ende oock ten lesten tot de hauen des eeuwighe salicheyts, gheluckichlijck mach [mogen] gheraken.

Godt die Abraham uwen knecht, wt dat Chaldeeusche Hur wtgeleyt hebbende, hebt altijts hem in alle sijne pel-

[p. 149]

grimagie ongequetst bewaert: ick [wy] bidde u dat ghy my uwen dienare [ons uwe dienaren] geweerdicht te bewaren: zijt my [ons] Heere in dese toerustinge, een bystant: op den wech een vertroostinghe: in die hitte, een ouerschaduwe: ende inden reghen ende coude, een decksel: in vermoetheyt, een waghen: in tegenspoet, een onderstandt: inde slibberachticheyt, een stock: in schipbrekinghe, een hauene: op dat ick [ wy] ghy mijn [ons] leytsman zijnde, gheluckelijck mach [mogen] geraken derwaerts ick reyse [wy reysen] ende ten laetsten tot mijn eyghen plaetse mach wederkeeren [ons eyghen plaetsen moghen weder keeren]

Wy bidden v Heere, weest hier tot mijne [onse] ootmoedighe ghebeden, ende den wech van uwen dienaer [uwe dienaren] ordineert tot voorspoet des salicheyts: op dat ick [wy] onder alle weghen ende verscheydentheden deses leuens, altijdt door v hulpe beschermt worde [worden.]

Ick bidde [wy bidden] v o almachtigh Godt, dat v familie ende huysghesin deur den wech des salicheyts mach wandelen; ende volghende de vermaninghe van den heylighen Ioannes den voorloopere, tot hem den welcken hy voorseyt heeft, gherustelijck mach comen, onsen Heere. Amen.

℣. Laet ons voorts gaen in vrede.
℞. Inden naem des Heeren. Amen.