Het Walchers liedeboeck (1611)

Het Walchers liedeboeck

(1611)–Dirk Schabaelje, Jan Philipsz. Schabaelje– rechtenstatus

Auteursrechtvrij

Vorige Volgende


[Niet en mach verlaten]
Na de wyse. Laet ons veriolysen NIet en mach verlaten Hem den mensche op syn Eyghen vermoghen swack Comt Godt niet te baeten Wy moeten met ghepyn Vallen ter neder vlack Vercryghen wy victory // hoe En comt dan niet de glory // toe Die ons doet onderstant Regiert ende bewaert Onser zielen vyandt Met synder cracht beswaert Dus en macht niet gheschien Als wy verwinnyngh strien Dat men op eyghen dade // romt Het is dwaesheyt, na dien T'selue deur Godts ghenade // comt Met dry hondert mannen Vervolghde op den padt Abram achterna Veelderley tyrannen Die zodoma de stadt Zeboim, Gomora Hadden berooft, begoste // hy Te slaen ende verloste // vry
[Folio 105v]
De ghevangen, en loth Syns broeders zoone maer Dit gheschiede van Godt Om maken openbaer Sijn crachten breet en wyt Oock den amaleckijt Is haest onder ghebleuen // want Godt gaf heyl in den stryt Deur moyses opgheheuen // hant Josua en conde De eerste reyse niet Winnen de stede ay Want daer was een sonde In den legher gheschiet Maer wel na desen Fray, Siet hier aen sijn te mercken bloot Des Heeren wonderwercken // groot Hy en heeft geenen lust Aen de sterckheyt vant peert Want Israel gerust Sonder spijesse oft sweert De stede Jerichon Lichtelick ouerwon De mueren vielen neder // plat Oock van den helt Simson Ghebeurde dickwils weder // dat Gideon vergaerde Een legher om den val Sijnder vyanden hert De heere verclaerde Te groot is het ghetal Soo verwinnijnge wert Israel soude spreken // schier Mijn macht is selfs ghebleken // hier
[Folio 106r]
Elck wederomme treckt Wie niet als eenen hont Het water op en leckt Wt den hant met den mondt Tgheschiede soo dat daer Slechs bleef een cleyne schaer En deur dese crijchslieden // gaf Godt dat sy deden haer Vyandt met schanden blieden // af In sijn harnas glimpte Den grooten Philistijn Stoutmoedich trat hy voort Ende hy beschimpte Israel int aenschijn Met menich bitter woort Veracht Dauidt met allen // seer Waer voor hy moeste uallen // neer Ghelijckerwijs het gijnck Met Holofernes macht Met benhadad Coninck Met der mooren gheslacht Met den sijriers, en met Anthiochy opset Een yder hem bedroghen // vont Teghen Godt hoe wel het Niet in smenschen vermoghen // stont Nemmermeer verwinnen En souden wy tghewelt Van sathan ons partie Waer gheen hulpe binnen In ons herte ghestelt Van onsen Heere die Het willen en t'volbrynghen // werckt En ons in alle dyngen // sterckt
[Folio 106v]
Ja gheenen mensche wort Tot der waerheyt ghebracht Hy en sy aengheport Al deur des vaders cracht Eylaes al onse daet Is van haer seluen quaet Alle volmaeckte gauen // goet In den vader bestaet Die onse Zielen lauen // doet Weest op v hoede.

Vorige Volgende