Het Walchers liedeboeck (1611)

Het Walchers liedeboeck

(1611)–Dirk Schabaelje, Jan Philipsz. Schabaelje– rechtenstatus

Auteursrechtvrij

Vorige Volgende


[O Godt wilt doch verhooren my]
Na de wijse Onse Vader in Hemelrijck Psalm. 86. O Godt wilt doch verhooren my Want ick arm en ellendich zy Myn ziele deur u cracht bewaert Want voor heylich ben ick vermaert Seer haest my uwen knecht bystaet Die hem altyt op u verlaet Ick weet dat ghy ghenadich zyt Want ick roepe tot u altijt Ghetroost laet uwen dienaer zijn Tot u heff ick de ziele mijn Groote goetheyt hebt ghy ghedaen
[Folio 111v]
Den genen die u roepen aen Verneemt O Heere mijn ghebet Op mijn smeeckende stemme let Ick aenroepe v in der noot Ghy verhoort my want ghy zyt groot Onder tghetal der Goden ziet En isser ws ghelijcke niet Vwe daden en can niemant D'heydens ghemaeckt deur uwe hant Sullen u aen bidden te saem Ter eeren al van uwen naem Dat ghy haer syt alleene, tot Een groot en wonderlicke Godt Een onderwijsinghe my doet Van uwen wech dat mijnen voet Na dynen wille nacht en dach In u waerheyt wandelen mach Mijn herte hem verblyt, wanneer Ick uwen name vreese seer Ick dancke u van herten gront Ende loue met mijnen mont Eeuwelick uwen name, want V goetheyt is soo abondant Dat Ghy mijn ziele hebt ghebracht Van onder wt der hellen gracht O Godt de stoute setten haer Teghen my, Ja een groote schaer Van menighen machtighen helt Syn na mijn ziele al ghestelt En sy en hebben u o heer Voor haeren ooghen nimmermeer Maer ghy syt barmhertich en goet
[Folio 112r]
Trouwe, ghenadich, vol lanckmoet Keert u te mywaerts ende gheeft Dat uwen knecht u sterckheyt heeft Dat van dyn hulpe niet en claeght Den Zoone van uwer dienstmaeght Een teecken laet aen my gheschien Op dat het mijn vyanden zien En schaemte crijghen, om dat ghy My staet in aller weghen by Met uwen liefflicken troost Die my by blyuen moet altoost Weest op u hoede.

Vorige Volgende