Basiorum Liber

[p. 7]

Basivm II

Vicina quantum vitis lascivit in ulmo,

Et tortiles per ilicem

Brachia proceram stringunt immensa corymbi,

Tantum Neaera si queas

In mea nexilibus proserpere colla lacertis,

Tali Neaera si queam

Candida perpetuum nexu tua colla ligare,

Iungens perenne basium,

Tunc me nec Cereris, nec amici cura Lyaei,

Soporis aut amabilis,

Vita tuo de purpureo divelleret ore:

Sed mutuis in osculis

Defectos, ratis una duos portaret amanteis

Ad pallidam Ditis domum.

Mox per odoratos campos, & perpetuum ver,

Produceremur in loca,

Semper ubi, antiquis in amoribus, Heroinae

Heroas inter nobileis,

Aut ducunt choreas, alternave carmina latae

In valle cantant Myrtea.

Qua violisque rosisque, & flavicomis narcissis

Umbraculis trementibus,

Illudit Lauri nemus, & crepitante susurro

Tepidi suave sibilant

Aeternum zephyri nec vomere saucia tellus

Faecunda solvit ubera.

[p. 8]

 

Turba beatorum nobis assurgeret omnis,

 

Inque herbidis sedilibus,

 

Inter Meonidas prima nos sede locarent:

 

Nec ulla amatricum Iovis

 

Praerepto cedens indignaretur honore,

 

Nec nata Tyndaris Iove.