Basiorum Liber

[p. 17]

Basivm VIIII

Non semper udum da mihi basium,
Nec iuncta blandis sibila risibus,

Nec semper in meum recumbe

Implicitum moribunda collum.

Mensura rebus est sua dulcibus.
Ut quodque menteis suavius afficit,

Fastidium sic triste secum

Limite proximiore ducit.

Quum te rogabo ter tria basia,
Tu deme septem, nec nisi da duo,

Utrumque nec longum nec udum:

Qualia teligero Diana

Dat casta fratri, qualia dat patri
Experta nullos nata Cupidines:

Mox e meis lasciva ocellis

Curre procul natitante planta

Et te remotis in penetralibus,
Et te latebris, abdito in intimis,

Sequar latebras usque in imas,

In penetrale sequar repostum:

Praedamque victor fervidus in meam
Utrinque herileis inijciens manus,

Raptabo, ut imbellem columbam

Unguibus accipiter recurvis:

[p. 18]

 

Tu deprecanteis victa dabis manus,

 

Haerensque totis pendula brachijs,

 

Placare me septem iocosis

 

Basiolìs cupies, inepta.

 

Errabis: illud crimen ut eluam,

 

Septena iungam basia septies,

 

Atque hoc catenatis lacertis

 

Impediam, fugitiva, collum:

 

Dum, persolutis omnibus osculis,

 

Iurabis omneis per Veneres tuas

 

Crimine velle pari subire.