Wisconstighe gedachtenissen. Deel 2: van de meetdaet

[p. 4]

Aenden Leser.

Aenghesien vvy hier de meetdaet voor hebben, tusschen vvelcke ende de^⋆ Beginselen onderscheyt ghemaeckt vvort, ende dat der^⋆ bepalinghen plaets eyghentlicker inde beginselen dient, soo en beschrijven vvy hier der grootheden bepalinghen niet, maer nemen die door de beginselen (als van Euclides of dierghelijcke) voor bekent, ofte aldaer te moeten ghehaelt sijn.

Ten anderen vvant ettelicke navolghende vverckinghen deur de thiende gedaen sullen vvorden, soo ist noodich dat de ghene diese begheeren te verstaen, kennis vande selve thiende hebben; vvelcke by ons elders beschreven sijnde, en doen daer af hier gheen besonder verclaring. Angaende de lichticheyt daer deur veroirsaeckt, die vvort metter daet sulcx bevonden, als inde voorreden der selve thiende verhaelt is: Waer af sijn Vorstelicke Ghenade (als meer dan na de ghemeene manier daer in ervaren sijnde) oock ghetuyghende, tot verscheyden mael geseyt heeft, daer in sulcke bequaemheyt ende sekerheyt te vinden, dat de vverckinghen by haer daer deur met lichticheyt afgheveerdicht, andersins deur ghebroken ghetalen niet en soude volbrocht vvorden sonder verdrietigen arbeyt, meerder dan oirboir vvaer daer an te besteden.

⋆ Elementa.

⋆ Definitionum.