Refereinenbundel, Anno 1524

[p. 55]

Refereyn XXVI
Met rechte bliue ic v eijghen voort

NAe dien dat hert ziel ende lyf
v eyghen is hoe mach ic min
Dan v groeten alst liefste wyf
daer god eer sant leuen in
Ic groet v allen mynder vruechden beghin
mynder sielen rust mijn sins confoort
Des werlts weelde bi mij moet sin
mit rechte bliue ic v eyghen voort

Hoe grote ghenuechte my mach ghescien
wat vruechden datmen ijewers sticht
Hoe constich werck datmen yewers laet sien
wat melodien datmen singhet of dicht
Nochtans v soete minlick aensicht
es my meer weelden zuden of noordt
Dan allet beschynen der sonnen licht
mit rechte bliue ic v eijghen voort

Dusent werf meer dan ick scriue ¹⁷
soe is mijn ionst tot v gheneghen
⁺Ic bidde dat twijfel van v bliue
ghetrouheyt wilt aen my pleghen
Wilt myn groot verlanghen weghen
by wylen gonnende een troostelick woort
Soe lieue en heb ic noyt ghecreghen
mit rechte bliue ic v eyghen voort

17 werf boven den regel bijgeschreven.

+ Fol. 40 (xxix)