Devote oeffeninghe op de vijf lettere van de soete ende alderheylichste namen Iesus ende Maria

Een Ghebedt alsmen buyten reyst.

In uwen naem aenveerde ick dese reyse o Heere, bekennende dat ick ben een pelgrim op der aerden: Wilt ghy o Heere mijn weghen bestieren, en my in alle plaetsen bewaren, teghen alle perijckelen der zielen ende des lichaems Ghy bewaerde Abraham uwen dienaer, als hy was ghereyst in Egypten, ende ghy verloste Sara zijn huysvrouwe uyt de handen van Pharao: Ghy bewaerde Isaac als hy was ghegaen in een vremt lant, ende bewaerde Rebecca dat den Coninck Abimelech haer

[p. 456]

niet en misdede. Ende als Iacob ginck nae Mesopotamien, ghy verlichte hem op den wech met een Hemelsche visioen, ghy gaeft hem voorspoet in alle zijne weghen, dat hy gesont ende weeldich weder-keerde. Alsoo o Heere, bewaert my oock teghen alle perijckelen, dat ick mach met ghesoncheyt ende met voorspoet weder t’huys komen, ende u daer af mach laven ende dancken. O Heere, als u volck reysde door de woestijne, ghy ginckt met hun, ende ghy verlostense van alle tegen-spoet: wilt oock o Heere met my gaen, ende my verlossen van alle quaden aenstoot der vyanden en der booser menschen. O Heere, als Tobias ginck nae Rages de stadt van Meden, ghy sout uwen heyligen Engel die met hem ginck, ende hy verloste hem van den visch die hem wilde verslinden: O Heere seyndt oock uwen Enghel, die my van alle dangier mach verlossen.

[p. 457]

Ja veel liever, o Heere, gaet ghy met my, ende wandelt ghy met my, alsoo ghy wandelde over den wech met die twee discipulen die naer Emaus ginghen, den welcken ghy op den wech waert aenspreeckende van Godlijcke dinghen: Alsoo o Heere, gaet ghy over al met my, en doet my altijt gedencken het ghene dat Godtlijck is, ende spreecken dat mijn ziele salich en profijtelijck is, dat ick door de verstroytheyt des weechs u niet en vergete. Gheeft my gratie, o Heere, dat ick deze pelgrimagie van dit kort leven alsoo mach volbrengen, dat ick eens mach komen tot mijns vaders lant, daer ick eeuwelijck sal rusten, Amen.