Een Christelicke waerschouwinge

voor alle menschen, hoe sy der werelt, de sonden, de lust des vleeschs, sullen schouwen ende mijden, wat den loon der sonden sy, en hoe sy haer moeten met Israel wt dat blinde, verkeerde Egipten, leyden laten...

Sephania 2. vers. 1.

Vergadert v ende coemt herrewaerts, ghy verdrietelick volck, eer dat oordeel wtgaet, op dat ghy niet als kaf by daghe wech vaert, eer den grimmighen toorn des Heeren ouer v coemt: soect den Heere alle ghy allendighe inden lande, op dat ghy syne rechten onderhout, soect gerechticheyt, soect ootmoedicheyt, op dat ghy inden daghe des toorens des Heeren, moecht verborghen worden, >&=c.

A. Ver. S.

Miches 4. vers. 2.

Coemt laet ons opclimmen, tot den berch onses Heeren, onses Godts Jacobs, op dat hy ons zijne weghen leere, ende op syne paden mogen wandelen, want van Sion sal die Wet wt gaen, en des Heeren Woort van Jerusalem.

1577.

[fol. A2r]

Groete.

A. VER. S. een medeghenoot der Gemeenten Jesu Christi, die om die belijdenisse der waerheyt ben veriaecht, veruolcht, berooft, ende na mijn leuen ghestaen, wensche veel ghenade ende vrede, liefde ende barmherticheyt, van God onsen lieuen Hemelschen vader, door synen Sone Jesum Christum, alle vrienden, broeders ende susters inden Heere, die nu hier ende daer verstroyt zijn, op dat wy hier in dese blinde verkeerde, erghe ende boose werelt, in dese laetste ende periculose daghen, onder dit ^a arch ende verkeert gheslachte, met een opgheheuen hooft mochten wandelen, Jae onsen hemelschen ^b roep also waernamen, dat wy de lendenen onses ghemoets ^c opschorten, onse lichten ontstaecken, in onse Siele brandende, voortginghen, Jae dat onse sprake aen allen canten, met dat ^d sout des godlicken woorts also vermengt ware, dat wy met woort ende wandel, sulck een getuygenis van ons gauen, op dat een yegelick mensche door onsen wandel ^e mochte spueren, dat God onsen Vader ende wy kinderen des Alderhoochsten door Jesum Christum gheworden zijn, op dat daer door, ende met werckinge Godes, die blinde werelt eenmael mocht recht opwa

a Phil. 2.15

b 1. cor. 1.24

c Luc. 12.35

d mat. 5.13

e mat. 5.14

[fol. A2v]

ken, haer bekeeren, boete doen, den ^f Euangelium van herten geloouen, op dat het rijcke Christi daghelicx vermenichfuldige ende toeneme, ende dat rijcke des Satans verualle ende afbreke, op dat sy mede, seg ick, deelachtich werden, dat vruechdenrijck, dat eewighe heyl, van Jesu Christo, die daer is een ghetrouwe getuyghe, ^g een prince der Coningen, op aerden die ons bemint heeft, ende gewasschen van onse sonden in zijnen bloede, en heeft ons tot Coninghen ende Priesteren ghemaect, voor God ende zijnen Vader,

den welcken sy eer ende ghewelt van eewicheyt tot eewicheyt, Amen.

f mar. 1. 15.

g apoc. 1.5.