Een Christelicke waerschouwinge

voor alle menschen, hoe sy der werelt, de sonden, de lust des vleeschs, sullen schouwen ende mijden, wat den loon der sonden sy, en hoe sy haer moeten met Israel wt dat blinde, verkeerde Egipten, leyden laten...

[fol. B5v]

liefde moet ghy ghemeyn liefde gebrucken, want lieue vrinden ghy sijt nv eenen ^u brief Christi niet met pen ofte int geschreuen maer met den gheest des leuendighen Godts, in die vleeslijcke taeffele uwes herten op dat hy van alle menschen gelesen worde, lieue broeders ende susters, wilt nu met ^a Serubabel het huys des Heeren ofte veruallen mueren Jerusalems helpen op timmeren, souckt ^b nu de salicheit uwes naesten, sterckt uwen broeder, die daer dwalen leydt op den rechten weghe, want so spreckt den Heere, dit ^c volck heb ick my toebereyt dat het mijnen lof soude vercondighen ghy sijt spreect Christus de ^d Stadt die op eenen berch leyt die van alle menschen gesien wort, ghy zijt dat ^e wtuercoren geslachte, dat heilighe volck dat volck des eyghendoms op dat ghy soudt vercondigen die duecht des geens die v geropen heeft tot zijn wonderbaerlijcke licht, daerom vrienden laet u ^f licht lichten nv in deese arghe ende boose werelt onder dit cromme ende verkeert gheslachte in dese laetste ende perijckelose daghen, lichtet als een licht des Heeren, brengt ^g vruchten voort die de boete weerdich zijn, beyde met woordt, leuen ende wandel ^h alle geroep laster sy verre van v met alder boosheydt, verghelt niet quaet met quaet, maer ouerwint dat quade met goet, vliedt de luegen, schout achterclap ⁱ hebt lief uwe vianden, wenst haer goet die v vloecken, doet wel die v haeten, bidt voor die die v cruys lijden veruolghinge aen doen, als die waere ^k Pelgrims campers ende strijders des Heren, die als nv inden Gods dienst ende ordeninghe ghetreden zijn, die welcke in die woestijne oft inden voorhof des tempels oft der Gheestelijcke hutte Moyse of inden Paradijse Gods haren wandel werck reyse ende arbeyt hebben. etc.

u 2. Cor.3.3

a I.Esdr.5.1 Aggi.1.12

b Phil.2.4. Luce.22.32.

c Esai.43.7

d Ma.5.14

e I.Pet.2.9

f Phil.2.13.

g Mat.3.2.

h Eph.4.31

i Ma.5.44 Luce.6.31.

k I.Pet.1.1