Het beleg van Gent ten jare 965

[p. 1]

Het belech van Ghendt, ten jare 965.

Als men screef het jaer Ons Heeren ix^c. ende lxv. so overleet Baudewijn de Caluwe, den iiij^den. grave van Vlaendren, ende liet achter een sone, die Aernaut ghenompt was, die hy hadde by Machtilt des hertoghen van Sassen dochtere, dewelke dede groote neersticheyt om de coopmanschap te doen rysen in Vlaendren, want hem dochte dat het volc was seer bequame om coopmanschepe te doene; so nam hy raet metten heere van Dixmude ende den burchgrave van Ghendt, heere van Staven, ende den gheslachte van Vaernewijc, Borluut, Matere, Uutendale, Volderstrate, Curtrosynkens, Vander Sare, ende meer andere, die al t' samen goede jonste droeghen tot de welvaert van den lande; so sloten sy met ghemeenen rade dat men alle de pennynghen ende ghelt, die men

[p. 2]

ghecryghen conde, vergaren ende fynanchieren soude, endemen gheboot alle havenen al Vlaendren duere daer schepen ancommen coeste ende quamen dat se alle soude commen met huerlieder goet tot Lamminsvliet nu Sluus, ende wat coopmanschap sy daer brochten men soude se afcoopen ende wel betalen, ende boven dien so waren noch boden uutghesonden in diveersche landen om te vercondighen wat coopmanschepe men brochte in Vlaendren tot Lamminsvliet, nu Sluus, men soude se afcoopen ende daer toe souden daer cooplieden ghereet sijn, die 't coopen souden sonder langhe te beyden; so sijn daer terstond cooplieden ende scepen commen van diveersche landen, die huerlier goet vercochten ende ontfynghen haer ghelt, so dat binnen corten tyde de haven van Lamminsvliet nu Sluus seer vermaert was in Spaengen, Italien ende meer andere landen, so dat de stede van Brugghe was grootelijcx rysende, ende de vermaerste van al het kerstenrijck.